Tedim khawpuiah chenna in, rawk leh Bike ruk bo a hluar hle

0

Chin State, Tedim khawpuiah tunlai hian rukhmang an pung sawt hle a, chhun enah pawh chenna in rawk leh Bike rukhmang an awm nual thu hriat a ni.

“ Nimin piah lawk khan in neitute pawn an chhuah chhungin an chenna in an rawk a, Kyats 104000 an ruksak a, bungraw dang chu an la hran lo. Chu mi hnuah, chhuna an inkhawm laiin Bike an ruksak bawk a, chhiat tawkte lenpui Bike te pawh an ruksak” tiin Tedim khawpuia tualchhung mi pakhat chuan a sawi.

Heng, rukhmang te hi ruihhlo ngaite an ni tlangpui tih hriat a ni a. Ram chhung boruak a that loh avanga hnathawh tur nei lo leh thil man a san vang a ni ber a. Tun hma aiin in rawk leh Bike rukhmang an pung sawt tiin an sawi zui bawk.

Thil bo leh rukhmang an tam sawt avangin Tedim khawpuiah Khawchhung thalaite leh mipui tlawmngai pawl ten Security an beih ngawrh thu hriat a ni bawk.

“Hetianga ram boruak a chhiat zela, ei leh in, silh leh fen bakah thil man a san chhoh zel chuan heng hi a bul tanna chauh a ni ang a. Nakin hnuah phei chuan hei aiin a hluar mai thei” tiin Tedim khawpuia tualchhung mi pakhat chuan a sawi.

September 18, pawh khan Construction Center-a hnathawktute chenna in, an rawknaah Kyats 150000 an ruksak tawh bakah Sunday-a inkhawm laiin Bike 2, an ruksak tawh thu hriat a ni bawk.

Share.

Leave A Reply

Exit mobile version