Telenor Sim Card atan registration tihtir a nih avangin customer-te an hlauthawng

0

Military council nena inzawmna nei Shwe Biangphyo company-in Telenor Myanmar company share tam zawk a lei hnuah Telenor mobile communication Sim Card hman laite titawpin registration a tihtir thu Telenor hmangtuten an sawi a ni.

Norway rama awm communication company lian tak Telenor chuan Myanmar ramah sipaiin thuneihna an lak hnuah human rights an bawhchhiat nasat em avangin, Telenor company chu chhunzawm chakna nei tawh lovin, Lebanon based M1 Group hnenah zuarin a hlan chhawng a.

Chu mi hnuah M1 Group-in military council nena inzawmna nei Shwe Biangphyo company hnenah Telenor Myanmar share zaa 80 chu a hralh leh a ni.

Shwe Biangphyo company neitu U Thein Win Zaw chu military council sipaite nena inzawmna nei leh petroleum lam distributor a nih bakah lunghlu (jake) laihchhuahna hna pawh a thawk bawk a ni.

Chuvangin, military council nena inzawmna neiin Communication Sim Card a lei hnuah awmze nei leh tum nei sa ranin sim card registration a tihtir a nih a rinawm thu sim card hmangtuten an sawi a.

Telenor hmangtu thalai pakhat chuan, “Telenor atangin messge a rawn lut thin a. Register rawh, ID a dik lo tih notice a rawn lang a. Sim card chu register a ngai a. Register a nih loh chuan hman theih a nih tawh loh thu a rawn tarlang bawk a. A nihna takah chuan mahni hminga register sa a ni a. Chutah chuan eng thil dik lo nge awm a hriat tawh loh. Mahse heti hian ka dah tawp a. An duh leh titawp mai rawh se tiin. Sim card chu ka phawrh chhuak daih a ni,” tiin a sawi.

Kum 2021, May thla chhung khan Telenor Myanmar company thuchhuah danin Myanmar ramah Sim card hmangtu mi maktaduai 18 an awm a, chung mite privacy chu a him tawk lo hle a. Chuvangin, Justice for Myanmar pawlin chung Myanmar mipui mi maktaduai 18 te privacy awmna tele communication military council sipaite kuta a lut mai an hlauhthawn thu an lo sawi chhuak tawh bawk a ni.

Share.

Leave A Reply

Exit mobile version