Thai leh Myanmar ramri, Kamchanaburi State leh Turku State-ah ni 3 chhungin Myanmar mi 100 chuang an man a. Heng an man zingah hian Rakhine (Ra Khaing= Arakan) State-a Rohingya mi te an ni tlangpui a.
Thai-Myanmar ramri atangin hriatpuina lehkha nei lo Myanmar mi an lut nual a. Tun hnai lawk atang khan human trafficking hmangin Rohingya te leh Myanmar mi te an man deuh ber a. Ni 3 chhung hian Myanmar mi 100 chuang an man tawh thu Myanmar Joint action committee peoples affairs chairman U Moe Kyaw chuan a sawi.
“January 28,29,30 Ni 3 chhung khan Thai-a lut tur hriatpuina lehkha nei lo Myanmar mi 113 leh mihring hmanga sumdawnga hralhtu 2 te Thai security ten an man” tiin a sawi zui bawk.
Janaury 30 khan Thai hmar lam, Turku State, Mae Sot (Me Sauh) khaw hmar lam Melama (Me La Mah) township-ah dan lova lut Myanmar ni 25 leh kawng hruaitu mi pakhat an man thu Border guard ten an thuchhuahah an tarlang.
Kamchanaburi State-a an man te hi Rakhine State atanga kal chhuak Rohingya mi te an ni a, Thai leh Malaysia ramri thlenga kal tur te niin an sawi.
“Anniho hi Yangon, Pago, Magwe, Rakhine State atanga kal Rohingya mi te an ni a, sumdawng (Broker) mi pakhat hnenah Thai Bath 20000 an pe a. Rakhine State atanga kal Rohingya mi te hi Bangkok khawpuiah chauh tawp mai lovin Malaysia ramri Soonkhla State thlenga kal tum te an ni” tiin a sawi zui bawk.
Janaury 26 pawh khan Thai, Chiang Mai District, Chin Taung township-ah dan lova lut Myanmar mi 23 leh kawng hruaitu pakhat an man tawh thu Thai border guard Battalion No.3 ten an thuchhuahah an tarlang.
Myanmar ram dinhmun a that loh avangin Myanmar mi dan lova kal chhuak ni tin a za tel Thai security ten an man thu hriat a ni bawk.
