Thai Foreign Minister Mr. Don Pramudwinai chuan Daw Aung San Suu Kyi nen an inhmuh thu chu July 11, Nilaini khan ASEAN Foreign Minister te hnenah a sawi chu Japan News Agency Kyodo-ah July 12 khan an tar lang a.
Daw Aung San Suu Kyi hian Myanmar buaina ching fel tura rem a tih thu Thai Foreign Minister chuan July 12 khan chanchinbu mi te hnenah a sawi a.
“Ani chuan sawiho a rem ti a, keini lam pawhin Myanmar buaina chin fel dan kawng kan zawng ve ngar ngar a ni” tiin Thai Foreign Minister chuan a sawi a ni.
Indonesia, Jakatar khawpuiah ASEAN Foreign Minister te chu July 11 atang khan rorel an tan kha a ni a. July 12 khan ASEAN Foreign Minister te Meeting, a Ni 2-naah hian Thai Foreign Minister hian Daw Aung San Suu Kyi thu sawi hi a pu lut a ni mai thei” tiin Kyodo news chuan a tar lang a ni.
Thai Foreign Minister hian July 9 khan Myanmar khawpui Naypyitaw khawpuiah a rukin a zin thut kha a ni a, Mr. Don Pramudwinai hian Daw Aung San Suu Kyi nen an inhmuh vawi khatna a ni bawk a.
Thai Foreign Minister Mr. Don Pramudwinai hian Daw Aung San Suu Kyi a hmuh chungchangah Military council-ten khawi news-ah mah tar lan an la nei lo a ni.
Kum 78-a upa Daw Aung San Suu Kyi hi Military council-ten kum 2021 February 1 atanga thuneihna an lak ni atang khan man nghal a ni a, Military council-ten thubuai 19 awrhtir tawhin kum 33 Jail tang tura hrem a nih hnuah Naypyitaw khawpui hmun pakhat Jail-ah an khung mek thu hriat a ni.
