Thai leh Malaysia ramri Sokhla State, Bankklan khaw ramhnuaiah Malaysia-a luh ruk tum, Myanmar mi nia rin hmeichhe 3 ruang chhar an nih thu Thai sorkar ten an sawi a. Heng ruang 3 te hi kut hnungkhirh leh nghawng zaia thah an ni a, damdawi inah an endik mek a ni.
He ruang hi March 15 tuk khan bawlhhlawh paih tur mi pakhatin a hmu a. Migrant Workers' Rights Network, Hat Rai khawpui in charge chuan heti hian a sawi.
#Myanmar mi nia rin hmeichhe 3 te ruang, bawlhhlawh paihna hmunah bawlhhlawh paih tur upa pakhatin a hmu a. Thuneitute hnenah a hriattir nghal a, police leh immigration ten an endik nasa hle a. A bul hnaiah hnathawhna hmun factory a awm bawk si lova. Thai mi an nih loh avangin tute tih an hre mai lova, rin dan chuan Malaysia-a kal tum te an nih rin a ni a. An thawmhnaw hak atangin Myanmar mite an nih kan ring” tiin a sawi a ni.
Heng ruang 3 te hi an thah hnuah an paih nia rin a ni a, an paihna ni 3 vel a liam tawh mai thei niin an sawi a.
“Heng ruang 3 te hi an nghawng zai an ni a, an paihna ni 3 a rei tawh mai thei tiin police ten an sawi a. A uih nasa tawh hle a, Hat Rai damdawi inah endik tura phurh luh a nih thu hriat a ni”
Thai chhim lama hetia mi 3 an thahna chungchangah police ten hriat thiam har an ti hle a, an endik mek a ni. An thahna Bankklan khua hi Bankok khawpui panna kawngpui a nih thu tualchhung mi ten an sawi a. Chhiat tawk chungchangah police te leh thuneitu ten hma an lak mek thu hriat a ni bawk.
