Thailand chhim lam Surat province district Kawhsamui thliarkarah Thai police sergeant pakhat chuan Myanmar hmeichhe pakhat chu a pawngsual a, September ni 17 khan hmeichhia chu Kawthaung khuaah an hawtir tawh tih hriat a ni. Bu Phut police station-ah ruihtheih thil (drugs) case avanga man tawk Myanmar hmeichhia, Thai police officer-in a lo pawngsualna thubuai chu court lamah kalpui mek a nih thu leh hmeichhia chu an khaw lamah a duh dan zawka hawtir a nih tawh thu, case buaipuisaktu U Aung Myo Than chuan a sawi.
Ani chuan, “Engkim endik a nih hnuah hmeichhe naupang chu an khua Kawthaung lamah hawtir a ni a. A haw hmain ani chu Relief camp pakhatah dah a ni a, mahse haw a duh thu a sawi avangin, nimin khan YaNaung diplomat ruahmanna hnuai atangin haw tir a ni,” tiin a sawi bawk a.
Thailand sorkar lam chuan pawngsualtu chu an ram dan dinglai pawngsual case article 177, 167, 204 hmangin Surat department-a Nakunsithamarat special court-ah thubuai ziah luh a nih tawh thu Myanmar Workers diplomat officer U Thet Wei Pyui chuan a social page-ah a tarlan a.
Kum 21 mi, Myanmar hmeichhia hi ruihtheih thil kaihhnawihah man a ni a, a tan hun chhung tura ruat kum 2 leh thla 9 chhung jail a tan hnu, Jauary ni 13 khan Myanmar ramah thawn kir turin, Thailand immigration department lamin an buaipui a, Bu Phut providential police station-a kawl lailawk a nih chhungin Thai police officer pakhat chuan a lo pawngzual a. January ni 18 khan Thai Social Relief pawl, Immigration pawl leh Myanmar diplomat officer-te chu inhmukhawmin, hmeichhia chu Bu Phut police station atang hmun him zawkah an sawn a.
Thai police officer chu thai pawisa (baht) nuai 4-a bail chhuah niin, a thubuai pawh court-a hmachhawn a tum a. Bangkok-a Myanmar Embassy lam pawhin Myanmar hmeichhe tana dinsakin tun thlengin a tanpui zel tih hriat a ni.
