Thailand Ayuttaya UThai township-a Myanmar mi hnathawk mi 400 chuang an hnathawh atangin an hnawh chhuah thu Pioneer Manufaturing (Thailand)-ten an thuchhuahah an tar lang a. An hnawh chhuahte zangnadawmna Bath makdaduai 97 an pek chungchangah Thai Labour Minister Mr. Suchart Chomklin chuan an thil tih hi dan milin action an la nge la lo tih kan endik dawn a ni a ti a.
Myanmar mi hnathawk mi 411-te hnawh chhuah chungchunga zangnadawmna Bath maktaduai 97 an pek thu hlaah pem hnathawk pawl zinga an chairman U Aung Kyaw chuan heti hian a sawi a.
“Industry hnathawk hi mi 1549 an awm a, hnathawh tur a awm tawh mumal lova, thawktute an chhawk nual zingah Myanmar mi 400 chawlhtirte tan zangnadawmna bath maktaduai 97 pek an ni a, an mimal Bank account-ah an thunsak a, an chawlhtir ta a ni” tiin a sawi a.
Hetia an chawlhtir avangin hna nei lovin an awm nual dawn a, hemi chungchangah dan milin thil an tih leh tih loh kan chhui fiah dawn a ni tiin Thai Labour Minister Mr. Suchart Chomklin chuan a sawi a.
A nihna dik takah chuan hnathawktu te hian hnathawh tur an neih loh hunah Social security fund atangin tanpuina a dawn theih a, hei hi Myanmar mi hnathawkten an hre lo thin a. Chuvangin Myanmar mi pem hnathawkten he tanpuina pawisa hi an dawng ve thei a ni tiin U Aung Kyaw chuan a sawi bawk.
Tuna Myanmar mi hnathawhna hmun Industry-ah hian Motor leh Car chi hrang hrang bakah Khawl chi hrang hrang an siam chhuak thin a. Myanmar mi hnathawk an awm nual thu hriat a ni.
