Thailand-ah Myanmar hmeichhe nula pawngsuala thah a ni

0

Thailand ramah ni 5 chhung bo tawh Myanmar hmeichhe nula ruang chu hmuh a ni a, chu nula chu Thailand mi mipa pakhatin, a pawngsuala a tih hlum thu a puang tawh a; a inpuanna chhan chu a thah hnua a bikbonaah chu nula thlaruain a rawn tihthaih thin avangin a tawpah a chhungte be pawpin a inpuan tak thu hriat a ni.

Tihhlum tawk chu kum 21, mi Myin Myin Khai a ni a, meia hal chhiat tawh a ruh la bangte chu DNA endik mek a nih vangin, tun thlengin an la phum thei lo niin, a Daw Mya Mya Aye chuan RFA a hrilh a.
“Kan la phum thei lo, ni 45 min nghahtir a. DNA endik hna chu ni 45 an rei dawn a, an hal hlumna hmuna vut tlem chu kan la, chu zawng chu a ni mai,” tiin a sawi a.

Thai-Cambodia ramri Pachin Buri district-a Bin Buri township, Cabun khuaa hna thawk, Myanmar nula Myin Myin Khai chu November ni 14 zing lam atangin a bo a, November ni 18-ah a ruang hmuh a ni.

Amah pawngsualtu kum 27 mi Thai mi Boonlai Buaman chu November ni 18 zanah Kabinburi district police-ten an man a. Chu pa chuan Myin Myin Khai-i pawngsual a tum laiin, ani invenga a lo tan ve tlat vanga a thah tak mai thu chu pawngsual tawk u hmeichhia Daw Mya Mya Aye chuan heti hian a sawi a.
“A inpuan dan chuan mi dang tel lovin, amahin a that a ni. Tuiah pawh a paih thla a, a ruang chu dah bo tumin a halral bawk niin police station-ah a inpuang a ni.”

Pawngsualtu chu a thil sual tih zawh veleh a chhungte awmna Sakayat district-ah ni 3 chhung a bibo a, chutih lai chuan a thah tak mitthi thlarauin a rawn tihthaih thin avangin, a mu thei lova, puithiam hnenah tanpuina dil mah se, a la rawn tihthaih zel tho a. A tawpah a thah tak nula u chu phone-a biak tumin thutlukna a siam niin Bangkok Post chanchinbu November 19 chhuak chuan a tarlang a.

Pawngsualtu chu Myin Myin Khai-i mutna room-ah lutin pawngsual a tum a, mahse hmechhiain a lo beih let avangin, a kut pahnih chu tawnin, a ka chu tape-in a char a, ramhnuai lamah hruaiin, a pawngsual hnuah tuiah a paih thla a, a tukah a ruang chu hmun dangah lain motor tyer nen a hal hnan tak thu pawh hriat a ni.

He pawngsual leh tualthah thubuaiah Daw Mya Mya Aye chuan, “Keini lam chuan keimahni ngeiin hremna pe thei ila chu pek kan duh a. Mahse, chutianga tih theihna kan lo a. Dan a awm a, mahse thi tura a chungthu rel a nih loh chuan keini chu kan lungawi thei lovang,” tiin a sawi a.

Thailand base, Education & Development Foundation-a labour incharge U Min Oo chuan, “Hetiang thil thleng, rang taka man chhuah hi a vang khawp mai. Hetiang hi man theih pawh a ni ngai lo a. Mahse, hna thawhna hmuna awmten an report vek a, a titu ngei pawhin a inpuang bawk a, thlarauin a tihthaih vang pawh a ni bawk a, kan hre chhuak thei mai zawk a ni,” tiin a sawi.

Myin Myin Khaichu Shan state chhim lam, Phekhon township Moe-pye hmun awm, Kayan hnam a ni a, pawngsualtu leh tualthattu Thailand pa chu Myin Myin Khai nen sangha manna len siamna factory-ah an thawk dun a, ani chu electrician a ni. Thil sualtitu chu dan anga hrem a nih theih nan police lamin Kabinburi police station-ah an la kawl reng a.

Myanmar hna thawkte tanpuitu pawl, Aid Alliance Committee (AAC) general inchrage U Ye Min chuan, “Myanmar nula pawngsual bakah rawng taka hal hlumna chu a rapthlak hle a. A titu chu an man tawh niin an sawi a. Mahse engtin chiah nge hremna an pek dawn tih chu kan la hre lo. Zangnadawmna aiin a sual man phut awk hremna an pe ngei tur a ni. Keini AAC lam chuan tanpui chak hle mah ila, tun dinhmunah engmah tih theih ka nei lo a ni,” tiin a sawi a.

AAC pawlin kum 7 liam ta atanga ram pawna Myanmar mi hnathawkte an tanpuina kawnga an chhinchhiah danin, Myanmar hmeichhia pawngsuala thah tawk case chu 3 aia tam a awm tawh a, pawngsual case chauh chu thla khatah case 2/3 a awm deuh ziah a, hremna pek a nih thin dan chu a inang lo hlawm hle a, thenkhat chu kum 3 hnuah chauh thubuai rel fel theih a ni a. A then chu kum 7-12 thleng tantir thin a nih thu, U Ye Min chuan a sawi bawk a ni.

Myin Myin Khaicase chungchangah ram pawna awm hna thawk pawl lam atanga tanpuina engmah an la dawn loh thu leh Bangkok-a Myanmar Ambassador erawh tawnglettu (translator) kaltlanga hriattir a nih tawh thu Daw Mya Mya Aye-in a sawi.

Share.

Leave A Reply

Exit mobile version