Thuneihna latu military council sipai pawlin a khaw pum deuh thawa an hal chhiat Chin state, Thantlang khua din that leh tuma sawitu military council bumna chu la kata fimkhur hle turin Interim Chin National Consultative Council (ICNCC) chuan a sawi a ni.
Sipai thuneihna paihthlak, Federal democracy tun din, politics-a intluktlanna leh mahnia rorel theihna Chin state din tuma indona muala beih a nih laia Thantlang khua siam thar lehna, din thar lehna tih thupui hmanga military council bumna chu fimkhur hle a ngaih thu June ni 3-ah ICNCC chuan thuchhuah a siam a.
Military council ruat Chin state sorkar kaihhruainain Thantlang khua din thar lehna leh sak that lehna chungchang sawihona meeting chu June ni 30-ah Hakha khuaah neih a ni.
Chu meeting-ah chuan military council ruat Chin state Chief Minister U Ngun San Aung, North-West Command Headquarters Deputy regional commander Major General Myo Thut Hlai, Thantlang township-a Pastor Dr. Ral Uk, khawtlang upa Pu Ngun Ngun Ram, Pu Ram Khar leh Pu Lawm Bik te telin Thantlang khaw din that lehna chungchang an sawiho a.
ICNCC thuchhuah chuan, “Thantlang khaw din that lehna leh sak that lehnaah chuan Transitional Justice a tel ngei ngei a ngai a. Chu inthlak danglamna tura dikna zawn chhuahna hna chu, military council-in amahni dodaltu mipuite chu force tam zawk hmana a beih lai hi chuan, thil theih a ni lo,” tiin a tarlang a ni.
Chubakah Thantlang khaw din thatna leh sak that lehna kawngah tualchhung mipui rorel pawl te, Mipui venghimtu pawl telin, ram chhung leh pawna awm Thantlang khaw mite, township chhunga awm zawng zawngte tela thawhho tur a nih thu ICNNC chuan a tarlang bawk a.
Tunah chuan Thantlang khaw chhungah, military council sipaite leh tualchhung mipui venghimtu pawl te inkhuarin, englai pawha inkap reng thei dinhmunah an awm reng a, chuvangin mipui lamin Thantlang khaw chhunga luh, awm leh tumna ang chi chu thil ni thei lo leh himna awm lo a nihna hre chiang turin ICNNC chuan a hriattir a.
Chutiang bawkin CDF-Thantlang sipaite pawn Military council-in Thantlang khua din thar leh sak thatna chungchanga hmalakna zawng zawng an pawm loh vek thu July ni 2-ah an puang chhuak a.
Thantlang khaw chhunga inkulh military council sipaite nuai bo vek an nih hma emaw dinhmun him tawka a awm thu thuchhuah siam hma emawa Thantlang khaw chhungah luta awm leh siam that leh hna thawh a ni dawn loh thu CDF-Thantlang chuan thuchhuah a siam a ni.
Chenna in 2000 chuang awmna leh mipui sing khat vel khawsakna Thantlang khua chu military council pawlin kum 2021 September thla atanga 2022 June thleng, a tlem berah vawi 35 a hal tawh a, biak in 12 telin chenna in 1500 vel a kang chhe vek tawh a. Thantlang khaw mi zawng zawng chu ramri leh Mizoram state lamah an raltlan mek a ni.
