Chin State, Thantlang khawpui lamah Military council sipaiten Jet Fighter leh Helicopter-in hma an lak mek thu hriat a ni a.
Hman ni lawk pawh khan Military council sipai 150 rualten Halkha leh Thantlang khua an pan a. CDF-ten an thununna hmuna nia an ngaih Halkha, Thanthlang inkar leh Thantlang khua chu May 25 atang khan Jet Fighter leh Helicopter-in an beih nasat thu CNF/CNA thupuangtu Salai Thet Ni chuan a sawi a.
Halkha-Thantlang khaw inkar Timit phai kiang Lungkhar leh Timit chuanhnuai-ah Military council sipaiten chung lam leh hnuai lam atangin an bei hrep tawh a, May 29-a an beih nawn lehnaah CDF sipai thenkhat hliam an awm thu hriat a ni bawk.
Military council sipaiten Thantlang township thunun leh an tum avangin sipai an chhek belh zel a, chung lam leh hnuai lam atangin an bei zel nia rin a ni a, hei ai hian inbeihna pawh a la nasa mai thei a ni tiin an sawi bawk a ni.
