Chin State, Thantlang khuaa Military council kut hnuaia police station pakhat CNA leh CDF tangrual ten February 9. Zing dar 2:00 vel khan an laksak a, Military council sipai 4 an thi a, silai 40 chuang a laksak thu hriat a ni.
CNA leh CDF-Thantlang tangrual ten Thantlang khua Zunghmun Ward-a police station chu February 8, zan dar 9:00 vel atang khan an luhchilh a. A tuk zing 2:00 velah camp an chhuhsak theih thu CNF thupuangtu Salai Thet Ni chuan a sawi.
“Thantlang khuaa police station-ah hian police leh Military council sipai 40 rual vel an awm a. Zan dar 9:00 vel atangin kan luhchilh a, a tuk zing dar 2:00 velah camp kan laksak thei a. Military council sipai 4 ruang kan chhar a, silai 40 chuang kan laksak a, mi dangho chu an tlanchhuak vek a, tunah ramhnuaiah kan zawng mek” tiin Salai thet Ni chuan a sawi.
Heng ralthuam an laksak bakah hian bomb leh vawm bomb an laksak nual a ni.
He inbeihnaah hian CNA Lt. Aa Thang, ram tan a nunna a hlan a, mi pakhat a hliam thu hriat a ni bawk.
Hetia Thantlang police station laksak a nih hnu hian Military council sipai ten chung lam atangin ralthuam an kap nasa hle a. Thantlang township Vanzang khaw tlanga CNA camp te pakhat leh Lungler khuaah chung lam atangin a bomb nasat thu Salai Thet Ni chuan a sawi.
Heng bakah hian Military council sipai dang ten Halkha khua atangin Thanltang khaw lamah an thiante tanpui turin an pan mek thu hriat a ni a, chung lamah Jet Fighter a thlawk kual reng thu hriat a ni bawk.
