Military council sipaite laipui kah vang leh mei hal vanga mahni khua chhuahsana khaw danga raltlan Chin state, Thantlang khaw miten ei tur leh damdawi inenkawlna an mamawh hle niin, Thantlang Placement Affairs Committee-IDPs Help-a thawk pakhatin a sawi a.
Ani chuan, “An buhfai kente chu a zo titih tawh a. Hriselna lamah pawh khaw thenkhatah CDM heath worker-te an awm loh avangin, an damlohin enkawltu an nei lo a, a tam zawk chu hriselna enkawlna lamah tanpuitu an nei lo a ni,” tiin a sawi.
Thantlang khaw mipui chu September thlaa khaw chhung a kan hnuah awm ngam tawh lovin, thingtlang khaw dangah an tlan chhia a,. Thantlang township atanga Khua-Ngarin tlang dung, Van Zang tlang dung, Zanat tlang, Vailam tlang leh Bawl tlang dunga khaw 94-ah an raltlan a. A then chu India ram, Mizoram state lamah an raltlan bawk a, Thantlang twonship chhunga raltlan zat chu 7725 an nih thu Thantlang Placement Affairs Committee-IDPs Help pawl chhinchhinna atanga hriat a ni.
Thantlang khaw chhunga awmten an khua an chhuahsanna hi thla 4 dawn a ni tawh a, an chakkhai ente pawh a zawh dawn tawh bakah, Thantlang khua atanga ei leh bar tur lak theih a nih tawh loh avangin, harsatna an tawk nasa hle a ni.
Tunah thlasik a lo thlen tak avangin, raltlante tan kawrlum, puan mamawhna a sang chho hle a niin, Thantlang Placement Affairs Committee-IDPs Help-a thawk pakhat chuan a sawi leh bawk a.
“Thlasik a lo nih takah chuan an in atanga an tlan chhuahin kawrlum, puante an keng tell ova, hmun thenkhatah chuan chutianga kawrlum, puan lum neih loh avangin, harsatna an tawk mek a ni,” tiin a sawi.
Chenna in sang hih vel awmna Thantlang mipui sing khat vel chuan September thla atanga thuneihna latu military councisl sipaite leh Chinland Defense Force (CDF-Thantlang) te inkah hnuah, sipai lamin laipui pawng tawng kah a, chenna in an hal chhiat avangin Thantlang khua chu an chhusan vek a ni.
Thantlang khuaah September ni 18 atanga thla 3 chhungin military council sipaiten laipui kap puak a, meia an hal luih avangin, kangmei vawi 11 lai a chhuak tawh a, chenna in 500 chuang a chhe tawh bawk a.
Myanmar ramah February ni 1 atanga sipaiin thuneihna an lak hnuah sipai leh mipui venghimtu pawl inkarah inkahna a chhuak deuh reng a, chuvangin, Chin state-a naupang, hmeichhiate telin mipui sing 7 chuang chu raltlanin an awm mek tih hriat a ni.
