Magwe region, Thilin township-a Military council sipaite hmatheh pawlte Thilin PDF ten an beihnaah an thih vek thu Thilin PDF Battalion commander Bo Kyi Kan chuan Mizzima Media a hrilh a.
He inbeihna hi February 26 zing dar 9:00 vel atangin Thilin township leh Pauk township ramri Ye Phyu (Yi Phiu) khaw bulah an inbei a ni.
Pauk township-a Kah Pah Sah 24, ven nana Thilin township, Pong Taung Nat khaw lu-a buk khuar Military council sipai 3 te, Bike-a an duty laiin Thilin PDF ten a hmunah an kah hlum thu Battalion commander Bo Kyi Kan chuan Mizzima Media hnenah heti hian a sawi.
“Thilin township leh Pauk township ramri Kah Pah Sah 24 camp-a duty mi 3-te mit hmuhah kah hlum an ni” tiin a sawi a. Thilin PDF lamah thi leh hliam an awm loh thu a sawi zui bawk a ni.
Pong Taing Nat khaw lu-a Military council sipaite hian pawl khatah mi 3, Bike-in an veivak thin tlangpui a. Minute 25 chhunga an inbeihnaah Military council sipai ten an ken mek MA 11 silai pakhat, silai mu bawm 3 leh silai mu tlawn 80 laksak an nih thu Thilin PDF ten an thuchhuahah an tarlang a ni.
Pauk township, Ye Phyu khua atanga mel 3 vela hla Kah Pah Sah 24, PDF ten an beih an hlauh avangin Pong Taung Net khaw lu gate, Ye Phyu camp gate leh Ta Yet Taw check gate-ah Military council sipaite an duty nasa hle a ni.
“Check gate 3-ah Military council sipaite leh Phyusawhti pawl ten an hual vek” tiin Battalion commander Bo Kyi Kan chuan Mizzima Media a hrilh a ni.
Myanmar hmun laili Magwe region-ah Military council sipaite leh PDF te, ni tin deuhthaw an la inkap reng a ni.
