Sagaing Region, Yinmapin District ngawa thing tawlh ru an awm chuan engmah zawh buai ngai lovin kah hlum an nih mai dawn thu Yinmapin District tualchhung PDF mi pakhat chuan a sawi.
He action an lakna tur thu hi August ni 24 khan tualchhung PDF ten an rel tluk a ni a, ram ngaw humhalh duh vanga rel an nih thu hriat a ni. Hemi hma pawhin thing kih leh tawlh lo tura khap an ni tawh a, an tihluih leh avanga dan siam leh a ni.
Tualchhung PDF pakhat chuan ‘ Ni tin thing phur Bike 50 chuang an awm thin a, PDF ten thing chu an man nain Bike leh a khalhtute an chhuah leh mai thin avangin an zah hran lo. Chuvangin an mante hi mihring pawh ni se, ramsa pawh ni se, kah hlum an nih dawn thu thutlukna siam a nih thu’ a sawi.
Ram ngaw hi acre nuai 4 vela zau a ni a, an kih ruk tam ber hi Patauh thing a ni a, a enkawltu pawh an awm mumal loh avangin tualchhung PDF pawl ten a chereu loh nan an humhalh ta ringawt a ni.
