Myamar ramah dik lo taka thuneihna pawng lak a nih atanga kum khat leh a chanve chhungin military council sipaiho kah hlum vanga pawisawi lo civil mi thite chu mi 2215 awmin, man tawk mi 15127 an awm tawh thu August ni 16 khan Assistance Association for Political Prisoners (AAPP) pawl chuan thuchhuah an siam a ni.
He chhinchhiahna hi kum 2021 February ni 1 atanga kumin August ni 16 thlenga AAPP record lakkhawm a ni a, a takah chuan chu ai pawha thi an tam zawk a rinawm a.
Spring Revolution tan atanga vawiin thlenga man tawk zat la hren mekte chu mi 12030 an awm a, chung zinga mi 1394 te chu an chung thu rel fel a, tan in lama khung mekte an ni.
Sipaiin thuneihna a lak atanga kum 1 leh a chanve hnuah arrest warrant chhuah avanga biru mi 1979 chuang awmin, tih hlum tawk 42 telin mi 121 chu tihhlum tura an chungthu rel tawh a nih laiin, tih hlum tura tih chu mi 125 thleng an awm tawh a ni a.
Revolution nen inkaihhnawiha man tak tan ina tihhlum tura an chungthu rel fel tawh chu mi 83 an awm a. Tun hnaiah intiamkamna emaw Bail-a chhuah mi 22 awmin, chutianga chhuak zawng zawng chu 3075 an awm tawh a ni.
Chu bakah thuneihna lak a nih atanga kumin 2022 July thla tawp thlenga military council sipaiten dik lo taka in an kalhsak tawh zat chu 709 chuang a nih thu thu AAPP chuan a tarlang bawk a ni.
