Myamar ramah dik lo taka thuneihna pawng lak a nih atanga kum khat chhungin military council sipaiho kah hlum vanga pawisawi lo civil mi thite chu mi 1954 awmin, man tawk 11065 an awm, chung zinga mi 1146 chu lung ina khung an nih mek thu June ni 16 khan Assistance Association for Political Prisoners (AAPP) pawl chuan thuchhuah an siam a ni.
He chhinchhiahna hi nikum 2021 February ni 1 atanga kumin June ni 15 thlenga AAPP record lakkhawm a ni a, a takah chuan chu ai pawha thi an tam zawk a rinawm thu tarlan tel a ni a.
Sipaiin thuneihna a lak atanga ni 500 chhungin arrest warrant chhuah avanga biru mi 1979 awmin, tih hlum tawk 41 telin mi 120 chu tihhlum tawh anga an chungthu rel tawh a nih laiin, tih hlum tura tih chu mi 114 thleng an awm tawh a ni a. Tun hnaiah intiamkamna emaw Bel-a chhuah mi 21 awmin, chutianga chhuak zawng zawng chu 3035 an ni.
Chu bakah thuneihna lak a nih atanga kumin 2022 May thla tawp thlenga military council sipaiten dik lo taka in an kalhsak tawh zat chu 617 chuang a nih thu thu AAPP chuan a tarlang bawk a.
Chutianga tualchhung, khaw chhung leh hmun hrang hranga pawl hruaitu, activist te, chanchinbu mite, CDM-a tel te leh pawl hrang hranga mite man, hren leh thubuai siamsak tawkte bakah Revolution chhunga nunna chante chanchin thar hriat nei chuan AAPP a hrilh hriat zel theih a ni.
