EU (European Uniont), Norway leh Sweden ramten Myanmar rama inthlanpui neih hnuhnung ber, kum 1 tlinna den chhanin, November ni 8 khan President U Win Myint, State Counsellor Daw Aung San Suu Kyi leh Political Prisoner zawng zawng chhuah vek tur leh Myanmar sipai hruaituten mipui duhdan zah a, zawm tur leh tharumthawhna titawp nghal tura an phut thu, thuchhuah an siam a.
European Union chuan Myanmar sipaiten dan bawh chhiaa an thil tihte chu kan dem tak zet a, mipuite nen ang khatin democracy duh thlanna kawnga an din tlat thu an sawi chhuak a.
Tin, Sagaing region leh Magwei region lam, Myanmar ram laili leh Myanmar ram hmarthlang lama sipai force indah belh zelna chuan a bikin, Chin state chhunga tharum thawhna a rawn sosang chho zel chu a hlauhthawnawmin, European Union tan Myanmar sipaiten Chin state mipuite chunga an thil tih dan chu kan dem tak zet a ni a ni tiin an tarlang a ni.
Chutiang bawkin Norway Foreign Minister Anniken Huitfeldt chuan, “Myanmar sipai hruaituten mipui duhdan chu an zahin an zawmsak tur a ni. Mipui chunga an sual rawngbawl chu an tawpsan nghal bawk tur a ni. Democracy rights chu tung ding lehin, tang zawng zawng pawh an chhuah zalen vek tur a ni,” tiin a sawi.
