Indo-Myanmar, Chin State, Falam Township, Rirkhawdar No.2 Ward, Tiau (Khawmawi) kiangah ,March ni 5 khan Military Council te leh Chin PDF tangrual te nen an inkap chiam a. He inkahna avangin tualchhung mi 2000 chuang vel chu ral lehlam Mizoram State, Zokhawthar khuaah an raltlan nual thu hriat a ni a.
Heng raltlan mipui tam zawk te hi Rihkhawdar township leh a chheh vela mi te an ni tlangpui a. Chhungkhat laina hnai nei lo mi 500 vel chu Zokhawthar tlawmngai pawl ten buaipui mekin Kudam hmun 3-ah an awmtir thu hriat a ni.
Zokhawthar khua, tualchhung mi pakhat chuan ‘ India sana zing dar 4:00 vel atang khan an rawn tlan lut nual a, a zat chiah ka hre thei mai lo. Raltlan thenkhatte chu an unaute hnenah an in vawm lut nawk nawk a. Innghahna tur nei lo mi 500 vel erawh chu Zokhawthar tlawmngai pawl ten tukthuan leh zanriah an buatsaihsak’ tiin a sawi.
Indo-Myanmar, Chin State, Falam Township, Rikhawdar No.2 Ward, Tiau (Khawmawi) khaw lu-ah hian Feb. ni 27 atanga Military Council te Camp siam chu, CNA, PDF-Zoland, CNDF, CDM-Siyin, leh CDF-Hualngoram tangrual ten an kahchilh a, Military Council lam mi 9 an thi a, PDF lam thi an awm loh thu hriat a ni.
Tunah rih chuan Zokhawthar khuaah hian raltlan mi 5000 vel an awm nia hriat a ni. CDF-Hualngoram lam pawhin ramri lama zin veivakte, bungraw phur motor te, lo lam kalte thlenga chhuak vak lo turin thuchhuah a siam bawk a ni.
