July 20 zing khawvar hma dar 3:30 vel khan CID (SB) leh Champhai District Police joint operation team-te chuan heroin Kg 3.039 / gram 3039 chu mi pali; TK. Khupa, Dinthar Veng, Champhai leh K. Lalrohlua, Mual Veng, Hnahlan te bakah Lalbiakngura leh Engzakho, Old Darkhai, Myanmar ve ve nia inchhalte kut atangin Hnahlan khaw dai, Champhai District-ah an man thu hriat a ni a.
Champhai PS-ah chhui zui turin leh dan anga hmalak zui zel turin thubuai ziah luh nghal a ni a, thu zawh fiah atan police ten an la kawl rih dawn thu hriat bawk.
Zokhawthar Police leh Assam Rifles te tangkawp pawhin July 19 khan hnam dang pahnih kut atangin Methamphetamine mum 20,000 an man bawk a. Zokhawthar Police leh Assam Rifles te hian an thu dawn bawh zuiin joint operation an nei a, Zokhawthar leh Melbuk inkarah Jaynal Uddin leh Fayzul Haque, Kakuripar, Karimganj District, Assam ve ve nia inchhal hnam dang pahnih hnen atangin Methamphetamine mum 20,000, Cheng Vaibelchhe 6 man hu an man a, thubuai ziak lutin, an hnu hi chhui zui mek a ni.
Hei bakah hian, July 18 zan dar 8 vel khan Champhai Police-te chuan Champhai Police Checkgate, Chalbawia Junction pal tlang tur Zokhawthar leh Aizawl Service Maxi cab an endik atangin Heroin Hawng 8, Gram 93 a rit leh a neitua puh mi pathum Maxi Cab khalhtu Vanneithanga, Zemabawk, Aizawl nia inchhal leh a mi phurh KC Hmingmawii leh Lalzawmpuii, Zokhawthar khua ni-a inchhalte chu an man bawk a, Heroin phurhna atana hman Maxi-cab pawh an hreng zui bawk a. Heroin neitua puh mi pathumte hi ND&PS Act hnuaiah thubuai siamsak niin nimin khan district court-ah hruai an ni a, Lung inah khung nghal bawk an ni.
