Chin state-ah military council leh Chin mipui venghimtu pawlte an inla inkap nasa hle a, military council lamah thi an tam ang bawkin mipui venghimtu pawl lamah pawh commander telin sipai 5 an thih thu hriat a ni.
January ni 23 khan Chin state Matupi, Kanpalet leh Falam township-ah military council sipaite leh Chin state venghimtu pawlte chu an inkap chhunzawm zel a, Chin mipui venghimtu pawl lama Commander telin sipai 3 an thi a.
Matupi township Rizua khaw bulah pawh military council sipaite leh Chin mipui venghimtu pawlte chu inkahin CDF-Matupi battalion 2-na hnuaia Salai San Thar chu a thi a, tun thlenga a ruang hmuh a la nih loh thu CDF-Matupi thupuangtu pakhatin heti hian a sawi.
“Kan sipai pakhat chu kan chan ta a ni. Nimin lam dar 3 vel khan inkahnaah a thi a, a ruang erawh chu tun thlengin kan la hmu lo. A ruang awmna hmun leh CDF te awmna hmun inkarah military council sipaite an inkulh tlat avangin, a ruang chu lak theih a la ni lo.”
Salai San Thar chu CDF-Matupi battalion 2-naah commander nihna thleng lo chelh tawh a nih angin, Rizua khaw bula inkahnaah pawh operation commander nihna chelhtu a nih thu hriat a ni a.
Sipai inkulhna hmun pui, Matupi khuaah tun hnai hian sipai motor 90 vel a rawn thlen belh leh a, Chin mipui venghimtu pawl an rawn beih let nasat theih dawn thu pawh hriat a ni.
Chin state chhim lam Kanpalet township leh Magui region inrina lamah pawh tun hnai khan military council leh CDF-Kanpalet te chu darkar khat chuang an inkap a, CDF-Kanpalet lam sipai Salai Si Tu Aung chu a hmuna a thih thu CDF-Kanpalet Division Commander-in heti hian a sawi.
“Si-Tauh-Tha-Ya lam atangin operation an rawn nei a, Kanpalet township leh Si-Tauh-Tha-Ya inrina hmunah keini mipui venghimtu pawl nen kan inkap a, kan lamah mi pakhat kan chan a, an lama thi leh hliam zat chu kan la hre lo.”
Falam township lamah pawh January ni 23 khan Chin National Defense Force (CNDF) leh military council sipaite inkarah inkahna chhuakin CNDF lamah Salai Sap Din Thuama (31) a thih thu hriat a ni.
Chutiangin Chin mipui venghimtu pawl lam sipai chu thi ve nual bawk mah se, lunghnual lova, a hma aia nasa zawka beih zel an tum thu CDF-Kanpalet Division Commander chuan heti hian a sawi a.
“Chin ramah chuan mahni township tinah vengtu pawl an awm a, tangrual pawlte pawh an awm bawk a. Battalion leh Division te dinin, chu mi hnuaiah committee pawl an awm leh a, chutiang a nih avangin, hruaitu lam emaw mi pakhat emaw chhiatna avangin, rilru lama beidawnna a thlen mai a hlauhawm loh. Kan sipai pakhat kan chan a nih chuan thinrimna neiin kan chak phah sawt a, beidawng lovin, kan chak phah zel zawk a ni.”
January ni 22 pawh khan Kalay-Tedim kawngpui, Khiangzing khaw bula inkahnaah mipui venghimtu pawl lama mi, Chin National Army-a Salai Chung Lian Sang leh PDF-Zoland-a Hmung No te chu bomb puak vangin, an thi a, military council sipai lamah pawh mi 40 vel lai an thih thu hriat a ni.
