Chin state hmar lam Tedim leh Falam township chhungah military council sipaite leh Chin mipui venhimtu pawl CDF te an inkap nasa cho zel a, military council lamin laipui an hman bakah van boruak lam atang pawha an beih thu hriat a ni.
Chin state, Tedim township Kalay-Tedim kawngpui leh Falam-Kalay inkal pawhna kawngpui pahnih atanga operation nei tura kal military council sipai pawl hnihte chu Chinland Defense tangrual pawl nen January ni 13 atangin an inkap tan a, sipai lamah thi leh hliam an tam ang bawkin tangrual pawl lamah pawh thi leh hliam an awm thu hriat ni bawk a.
January ni 17, dar 10 velah Kalay-Tedim kawng, Hai-zing leh Tai-ngen khaw inkara hma lam pana kal thei tawh lova dang chepa awm, military council sipaite tanpui tura Kalaymyo atanga sipai motor 3 leh machine gun vuahna motor te chi pahnih chu Chin mipui venghimtu pawl CNA, CDM Siyin, PDF-Zoland, Kalay PDF, Zomi PDF, Zongam Army, CDF-KKG-2 pawl ten lo ambush-in an kap a, sipai lamah 10 chuang thiin, inhliam an awm nual bawk thu CDM-Siyin pawl thupuangtuin heti hian a sawi a ni.
“Dan chepa awm military council sipaite tanpui tura lo kal sipai motor 3 leh machin gun keng tel motor te chi pahnih chu Kalaymyo atangin a rawn chho a. Keini lamin kawng kar lakah kan lo kap a. A che chhe zawka an tan avangin, an kir leh ringawt a. A tlem berah 10 vel chu kan kap fuh a. Hliam pawh an tam khawp mai. Keini lamah chuan hliam kan awm lo.”
Indo-Myanmar insumdawn tawnna kawngpui ber pakhat Kalaymyo atangin Chin hill lamah sipai lamin force 100 chuang an tir a, Khiang-zing, Hai-zing leh Tai-ngen khaw inkarah January ni 13 atangin Chin mipui venghimtu pawlte an inkap zui a.
Military council sipaite chu Hai-zing leh Tai-ngen inkar khuaah hma lam pan thei lovin, an tang a, January ni 15 atangin military council lamin jet fighter hmangin air strike a nei a. Chu bakah Kalay University campus chhunga inkulh sipaite pawn laipui hmangin ni tin vawi 5 vel an kap bawk niin, PDF-Zoland thupuangtuin heti hian a sawi bawk a ni.
“Anni lamin min rawn bei a, keini lamin kan lo bei let ve nghal bawk a, anni chu an tawlhsawn nghal a, chutiang dinhmun a nih takah chuan, rei loteah Kalay University campus chhungin laipuiin min rawn sai zui nghal bawk a. Keini lam chu hmun him lamah kan insaseng a, chu mi ni chhunah indo thawlhna pahnihin kan inkulhna hmun chu an rawn bei leh bawk a ni,”
Chung lam atanga Military beihna avangin, Chin mipui venghimtu pawl lamah mi 7 an hliam a, Chin National Army-a Thangpi pawh January ni 16-ah a thih thu hriat a ni.
Chutiang bawkin, Kalay-Natchaung-HakhaLay-Webula khua atanga Falam-Kalay kawnga kal military council sipaite leh Chin National Front (CNF) chu January ni 14 atangin ni tin an inkap deuh reng a, military council lamah sipai 15 an thih tawh thu CNDF chuan thuchhuah a siam a.
Military council sipaiten Chin state hmar lam chu force tam tak hmang leh thuang hniha an beih chungchangah PDF-Zoland thupuangtu chuan heti hian a sawi a ni.
“A nihna takah chuan Chin state hmar lam chu an control thei tawh lova, thla 2/3 kal ta atangin camp chu dah ve bawk mah se, chung an sipai camp atanga pawn chhuah chu a rem tawh lova, an ration lakna kawngte pawh a ping tawh a, kawngpui tluan chu keini mipui venghimtu pawl lamin kan thunun tawh zawk a, Chin state hmar lam rawn thunun leh tum an ni ber a. Kalay-Tedim-Falam-Webula kawng pawh keini Chin state pumpui leh Sangaing region-a awmte tana tlan chhuahna a ni a, chu chu mipui kutah a awm ta bawk si a, chu tak chu thunun leh tumin tunah an rawn bei niin ka hria.”
Military council sipaiten Chin state hmar lamah force an dah belh laiin, Chin hill bul thuta awm Kalaymyo lamah pawh zan lamah silai puak ri hriat tur a awm deuh reng a, January ni 16, zanah pawh Kalaymyo khaw thlang lam, Tahan vengah military council sipaite leh Urban Guerilla pawlate an inkap a, sipai 2 an thih thu Kalaymyo PDF lamin thuchhuah an siam a.
Chu mi zan inkahnaa sipai lam hman laipui mu puakin Tahan venga chenna in thenkhat a deng fuh a. Tahan veng chhungah military councisl sipai laipui vawi 3 zet a puak tawh bawk a ni.
