Tun hnai lawk khan Military council sipaite leh PDF/CNDF te chu Sagaing region, Kalaymyo lamah leh Chin state Falam khaw lamah nasa takin an inkap a; military council sipai 30 vel zet an thih thu hriat a ni.
Nimin piah lawka Chin state Falam township chhunga military council sipai inkulh chu Chin National Defense Force (CNDF) ten zing lam dar 7 velah an va bei a, darkar 2 vel zet an inkah hnuah sipaiin laipui leh silai puak rang tha chi an rawn thawh chhoh zel avangin, CNDF te chu an tawlh kir leh a ni.
Chu inkahnaah chuan sipai lamah 10 aia tlem lo an thi a, June ni 29-a CNDF thuchhuahah chuan 20 vel thi niin a tarlang a ni. CNDF lam hnai tak pakhat chuan, “Inkah laiin sipai lamin laipui an hmang nasa lutuk a, kan bei let thei lo. Kan tawlhsawn ringawt. Chutih lai chuan keini lamah mi 3 kan kiam, laipui mu perin a fuh bawk a, inhmuhkhawmna tura kan tih hmun hmasa ber kan thlen chuan chung mite pathum chu an rawn tel ve ta lo a ni,” tiin a sawi a.
Chutia an intiamna hmuna an inhmuhkhawm hnu chuan chung mi pathumte chhanchhuak turin inkahna hmunah an kir leh hlawm a, mahse, mi pathum chu sipaiten thatin an lo phum tawh a, an ruang zingah bomb an kam tel nghal a, chu rah puah bomb chu puak nghal thei mai turin a locktu pawh phelh sa vekin an dah a ni.
CNDF zinga pakhat chuan, “CNDF bomb lam chinchang hria (mine expert) chuan kan thiante chu lak chhuah a duh tlat avangin, tlang pawn deuha an ke rawn lawr deuh pakhat chu a kutin a hai a, a rawmawl chu a keah tawnin hla deuh hlek atangin a pawt a. Chu veleh a rawn puak thut a, a pawttu pawh chu a lu leh kete a thlawh bung vek, a thi nghal tawp,” tiin a sawi.
Chu bomb puah hma chuan CNDF-a an hruaitu pakhat chuan bomb/mine expert ber hnenah hrui sei deuh hmang tura hrilhin, amah ngeiin hrui la turin a kal a, mahse hrui sei a rawn thlen hmaa a lo pawh chhuah takah chuan bomb puak per chuan mine expert bakah CNDF sipai 7 chu hliamin, damdawia inenkawl a ngaih phah a ni.
Hetiang deuh bawkin, Kalaymyo atanga darkar 1 tlan vel Tauhchian khuaah chuan Kalay People Defense Force te inkulhna hmun chu military council lamin an luh chhuah thu hriat a ni bawk a.
Thil thlen dan chungchangah,Kalay PDF-a tel pakhat chuan military council sipai 100 velin an rawn luhchilh hma, June ni 28 zing lam atangin laipui hmangin an rawn ral sai tan tawh thu a sawi a.
Ani chuan, “Kan awmna hmun leh kan awm tih chu sipai lamin an hriatna a rei tawh a. Mahse, kawng chin an hriat chian loh avang leh kawng kawhhmuhtu an awm loh avangin an rawn lut ngam mai bik lo a. Ni 28 chuan laipuiin vawi 20 vel chu min rawn thawng a. Kan riah bukte pawh a chhe nual mai. Keini PDF sipai 100 vel pawh kan piah tlang bult hut lamah kan tawlh sawn a ni,” tiin a sawi a.
He mi tuma Kalay PDF lam vanduaina chhan pakhat chu sipai lam Tauhchian khua an rawn thlen laiin, PDF camp pui ber kawh hmuh turin a khuaa mi pakhat chu an rawn hruai a, chu an mi hruai chuan engkhaw hre lovin, PDF ho an camp atanga tawlhsawna an inhmuhna hmun tura an ruahmanna lamah a lo hruai a, PDF ho lah chu, chu mi hmun panin an kal ve bawk a. A tawpah chuan sipaiho nen an intawk ta a ni. Chu mi hmun chu Kalaymyo-a Tauhkyian, Tasi, Natchuang leh Natmuiang khuaa CDM police leh PDF te training neihna thin pakhat a ni.
PDF pawl zinga pakhat chuan, “Kan inhmuhna ruahmanna hmunah chuan sipaiho nen kan intawk titih ta mai a, keini chu tlang lamah an tlang chho vat a, a hmun hnihna lam kan pan leh nghal a. Min rawn kap nasa khawp mai, laipui te hmangin, vawi 80 vel chu a niang. Tlang bul thut thleng chu min rawn um zui a. Mahse, chu mi hnu chuan an talh kir ve leh a. Kan zingah chuan pakhat chiah a hliam, nasa lutuk lovin,” tiin a sawi a ni.
Chutianga an camp thlenga rawn luhchhuah an nihna chhan bera lang chu June ni 27-a Magui region (Sagaing nena inrina) Gangaw township atanga Kalamyo lama lo kal sipai motor chu Kalay PDF ten an lo beih vang a ni ber a. Chu sipai motor pathum chu PDF ten Khui-Chei khua leh leh Tan-pho khaw inkarah an lo lambun (ambush) a, military council sipai 9 thiin, hliam tawk an awm nual bawk a ni.
PDF sipai pakhat chuan, “Sipai motor 3-ah sipai 60 vel an awm a. Keini chuan hand-grenade-in kan vawm a. Chu mi zawhah kan inkap tawn a, a nasa khawp mai. A tawpah hand-grnade thovin, kan vawm leh vak a, tawlh sawnin, kan tlan chhia. Minute 45 vel chauh a rei,” tiin a sawi a ni.
Mahse, chutih laia an hriat loh awm pakhat chu, chu mi ni chuan Kalaymyo Regional Command Military Headquarters-a commander (lal ber) chu, Kalaymyo Natchaung veng puithuam school-a an mi man PDF lam kaihhnawih thalai mi 2 te chhuah theih dan kawng ngaihtuah turin sipai motor 5 meuh hmanga a rawn chhuah ve bawk a chu a ni.
PDF zinga mi pakhat chuan, “Thalai pahnihte chu puithiam school-ah a rawn dah a, an vengtu turte pawh a dah nghal bawk a. Inbiakrem dan kawng zawn a, inrem theih a nih chuan an pahniha chhuah tuma rawn ti a ni ber a. Mahse, he lamah hetianga kan lo inkah buai takah chuan a thinrimin a let leh ringawt tih kan hria,” tiin a sawi a ni.
Chu mi hnu atangin chuan Kalay PDF hmun pui ber chu a rawn chhu zui a, a tuk lawkah Chin state-a CNDF camp te pawh a bei chho ta zel a. Tun thlengin an mi man thalai 2 te pawh chu an chhuah duh lova, ram hnuaia CNDF te camp zawn hna pawh an la zel tih hriat a ni.
He an mi pahnihte hi June thla tir lama Kalaymyo beer dawr pakhata kal thalai 5 zinga mite niin, Myo-Ta veng police check-a check an nih laiin, phone keng lo angin an insawi a, mahse a motor tlan chhuah dawnah motor chung atanga phone a rawn tlakthlak leh si avangin, an 5-a man an ni a.
