Urban Guerrilla fighter-te operation chu a kal vung chho zel a, Yangon region pakhat chauhah pawh September leh October chhungin firfiak sipai leh police bakah Dalan 100 vel zet then fai hna thawh a lo ni tawh a. Ram pum anga chhut chuan military council hnung zuitute 1500 chuang tihhlum an nih bakah 500-in hliam an tuar a. Chutih rualin indona, politics leh business hmun pawimawh 950 chuang mipui sipaiten an bei thei bawk a ni
Chutianga operation nei thei tura chet lak chu underground sipaite tan thil awlawi a ni lo a. Lei lama operation neih dawn chuan a hmasa berin mipui a khawih tel thei ang em tih hi enchian hmasa a ni a. Chu mi hnuah mipui veivah loh deuhna, firfiak sipaite awm theihna hmun chu a bika thlangin operation kalpui thin a ni.
Chu mi hnuah pawh harsatna a la awm cheu zel bawk a. Supply phur leh a phurna tur kawngte thlan thiam a ngai a, thlan fuh loh chuan leh lam zawk operation lo nei thut nen innang chingin mihring nunna bakah ralthuam thlenga pek a ngaih chang te pawh a awm thei a. Chu chu Urban Guerilla pawlte harsatna tawh leh inpekna lian tham tak a ni.
Chu mi hnuah underground sipaite veivahna leh hmun him lama insawnna tur sum budget an khawpkham tak an nei ngai lo a, a tlangpuiin underground (urban guerilla) pawlten an ralthuam hman tur chu anmahni pawisaa lei a ngai thin bawk. A chhan chu anni ho pawl tanpuitu tur an awm mumal thin lo a, tanpui tur zawng leh tanpuina dawn hun nghaka lo thut reng lah a ni thei lo va, chu lai tak chu an harsatna lian tak pakhat a ni bawk.
Chutianga an harsatna suking turin vehbur khawn ang han ti dawn se, PDF te anga mipui hriata han intlangzarh ang chi lah a rem si lova, chutianga an tih chuan tanpui duh leh tanpui ngam an awm lo mai thei bawk a, sum neih loh chuan ei-in, dam loh leh ralthuam lamah harsatna a awm chho zel a, a tawpah rilrua tichak reng sia operation nei thei lova, chawlhsan hial a ngaih changte pawh an tawk thin a ni.
Sawi tawh angin, Urban Guerilla pawlten operation neih dawna an venthawn ber chu mipui tan a him tawk em tih kha a ni a. Khawpui chhunga che tur an nih angin mipui awm lohna hmuna operation neihna a har viau a. Chuvangin, tun hi mipui lam pawh mahnia invent hun, mahni hriatna hmanga firfiak sipaite awmna leh chet tlatna hmun nen a hla thei ang bera inthiarfihlim a pawimawh tawh a ni.
Underground pawl lam tan mipuite engkim hrilh hriat chu thil theih a ni lova, mipuite an him dawn loh avanga operation kal lai thulh leh te pawh a awm a. Vauna thuchhuah siam hi a mai mai lo tih pawh mipui lamin hriat chiansak a tha hle. Chutih rualin bomb tihpuahna thenkhatah mipui lamin duh khawp lohna leh nep tihna te pawh an nei mai thei, a chhan chu a vawi khatna bomb thawk chak lutuk chi hman nghal hi mipui lam tana him lohna a awm thin vang te a ni tih hre thiam ila.
A tawp ber atan, Revolution sipaiten mipuite tana an thuchah duh chu, “Revolution-a sipaite rilru put hmang chu Chak leh Chak loah ni ber lovin, a tawp thlenga do zel hi a ni a, mipui lam pawhin anni tan tlem lua awm lova, thei ang tawka tanpuina lo pek hi a pawipawh hle a ni” tih hi.
Chuvangin, Urban Guerilla te leh mipuite inkutsuiha an thawkho zel a nih chuan hlawhtlinna chu ban phak lawkah a awm a; chuvangin, dikna atana indona hlawhtling turin harsatna karah pawh mipui lamin an tawiawm zel a ngai a dawn a ni.
