United State of America, Washington DC khawpuia innghat, NUG foreign office hawnna inkhawm thu February 13 khan an buatsaih thu hriat a ni.
He hawnna inkhawmah hian NUG foreign Minister Daw Zin Mar Aung leh Deputy Minister U Moe Zaw Oo, Myanmar UN Ambassador U Kyaw Moe Tun bakah US Deputy foreign Minister Mr. Uzra Zeya leh sorkar thuneitute an tel thu hriat a ni.
US Deputy foreign Minister Mr. Uzra Zeya chuan “US sorkar leh Burma Act dan angin Myanmar mi ten Democracy kawng an zawhnaah kan thlawp zel a ni” tiin a sawi a ni.
Myanmar Military council ten phuahchawpa inthlanpui an buatsaihna turah US leh ram hrang hrang ten an duh loh thu a sawi tel bawk a ni.
NUG Office hi US President awmna White house awmna atanga mel chanve lek hlaa awm a ni a.
He Office hi nikum November thla khan hawn tawh a ni nain tunah US Deputy foreign Minister sawmin official taka hawn nawn a ni.
Hetia NUG office an hawn nawn leh hi offcial taka US-in a hriatpui thu NUG foreign Minister Daw Zin Mar Aung leh Deputy Minister U Moe Zaw Oo ten RFA Media-ah an sawi fo tawh a ni.
RFA Media-in a hriat dan angin NUG office hi US, UK, Australia, France, Check, South Korea, Japan, Norway ramah te an hawng tawh a ni.
Heng, ram hrang hranga NUG office hawn te hi thuneihna pawng laktu Military council ten an dem hle a. Tun tum US-a NUG office an hawn chungchangah phei chuan an ngaihdan an la sawi rih lo a ni.
Tunah chuan United State of America, Washington DC khawpuiah Military council Ambassy office leh NUG Deputy foreign Minister office tiin inep tawn office pahnih a awm tawh a ni.
