Vawk kal (kidney) pakhat chu mihring kal thlak nan hlawhtling tak hman a nih thu US doctor ten an sawi a. Chu chuan kal thlak ngai, kal thawhtu hmuh zo tante tana harsatna sut kian theihna a nih an beisei thu pawh an sawi bawk a ni.
Chutianga Kal an thlaksak tak dam lo chu Ko Mar a ni a, a thluakin hna a thawk tawh lo a. Khawl hmanga thawktir reng a nih tawh avangin, a kal chu hlawhtling taka thlak ni mah se, a that chhuah leh chu a beisei awm vak lo a.
Kal an lak chhuahna vawk chu a chi thlak danglam (genetically modified) vawk niin, chutianga thlak dang lam tawh taksa peng hrang chu mihringa dah luh a nih chuan mihring taksa pawhin a lo pawm ve thei mai niin an sawi a.
He enchhina hi mi thiam (expert) dangin an la enchhin loh bakah ziaka tarlanna pawh a la awm lo a. Chuvangin, expert-te chuan he enchhinna hi he tiang lama thiamna sang ber pakhat a ni e, an ti hial a ni.
Hetianga enchhinna hi mihringah ni lo, ransa (primates) dangah chuan enchhin a ni tawh a. Mahse mirhinga enchhinna chu hei hi a vawi khatna a ni a.
Vawk taksa bung hrang mihringa hman hi thil thar a ni lo a, vawk lung dawt (heart valve) chu mihringah hman a lo ni tawh a, mihring lung dawt nen pawh a intiahin a inmil hle a ni.
New York University/Langone Health medical centre-a thawk doctor-ho zinga hruaitu ber Dr. Robert Montgomery chuan, “Mihring Kal nen thlak thlenga a hna thawh dan a pangngai em tih kan enthlak chuan mihring Kal (kidney) ang chiahin hna a thawk tih kan hmu a, mihring taksa pawhin a lo pawm thlap a ni,” tiin a sawi a.
Amah ngei pawh taksa peng thlak (organ transplant) tawh, Dr. Robert Montgomery chuan, “Hlauhthawnna nasa tak a awm ang tih chu ka hre thiam, ka sawi duh zawk chu Kal (kidney) thlak tura nghak damlo zaa 40% vel hi Kal petu tur an hmuh hmain an boral thin a. Keini chuan vawk hi a sa ei atan kan hmang a, hriselna lama lung dawt (heart valve) thlak nan kan hmang a, tuna Kal thlak nana kan hman tum pawh hi a danglam lutuk lovin ka hria,” tiin a sawi bawk a ni.
Mahse, he enchhinna hi chiang zawka enchhina leh zirchianna (research) neih a la ngai dawn ni a hriat a ni.
