Kum 2022 khawvel remna awmna ram tarlanna list (World Peace Index)-ah sipai thuneihna lak leh ram chhung buaina tawk mek Myanmar ram chu ram hrang hrang 160 zingah 139-naah a awm thu hriat a ni.
He Index siamtu pawl chu sorkar lam nena inkaihhnaiwhna nei lo, khawvel huap mimal pawl pakhat Institute of Economics and Peace pawlin buatsaih niin, khawvel ram hrang hranga tharum thawhna thelngte zirchiangin list an siam thin a.
Remna (peace) an tehna ber chu ram pakhat chhung leh pawn lama tharumthawhna, sipai budget, thenawm ram nena an indawr dan, human rights an kalpui dante telin thil chi hrang hrang ena teh a ni. Kumina Index list-a an dah danah chuan khawvela ram ralmuang ber chu Island niin, a dawtah New Zealand, Ireland, Denmark, Austria ramte niin, top 5-ah an awm a.
Index list hnuai lam hauhtu, ram ralmuang lote chu Afghanistan, a chung lamah Yemen, Syria, Russia leh South Sudan ramte an awm bawk a. Singapore ram chu 9-naah awmin, 10-na chu Japan ram niin, Asia khawmuala ram ralmuang ber nihna a hauh a, ASEAN ram chhungah chuan Myanmar ram chu ralmuang lo ber, list hnuai berah a awm thung a ni.
Ram ropuia chhiar tel, China chu ram 160 zingah 89-naah a awm a, US erawh 129-naah a awm thung a. Myanmar ram thenawm zingah India chu 135, Loas 51, Thailand 103, Bangladesh 96-ah an awm hlawm bawk a ni.
