Yangon Botataung, kawng no. 44-a in chhawng pakhat military council sipaiten silai hmet puaka a chhunga awm thalaite man a tum tum khan 5 chu an zuang thla a, 2 thi nghalin, 3 man an ni a. Chuta awm ve Kuang Min Thant pawh silaia kah hlum a ni tih thu thang pawh a awm bawk a.
Mahse, thudik zawk chu Kaung Min Thant chu sipaiten an kap hlum lo. Ani chu in chung lamah lawn chhuakin a tlan chhuak thei a, tunah chuan hmun him lamah a awm tawh a ni. Chu mi chungchanga Irrawaddy-in a interview-na han sawi chhawng ta ila:
Zawhna: Thuneihna lak a nih hnuah i nun engtin nge a inthlak danglam?
Chhanna: Ram chhunga thuneihna lak a nih hma chuan mahni hlim zawng leh duh zawng angin, thiante nen thingpui dawr velah te hunk ka hmang tam khawp a. Ka nu leh pa te hi ka tet tea tanga inthen an nih angin, ka pi bula khawsa ka ni a. Thuneihna lak hnuah chuan ka chhungkhaw thar, tuna ka thiante nen 44 street-a in pakhatah hian kan khawsa ho a, a naupang ber ka nih angin, min zilh ve deuh reng a. Ka nunah zir tur pawh ka ngah phah hle a, lehkhate kan chhiar a, politics lam pawh ka hriat belh a ni.
Zawhna: Sipai thuneihna dodalnaah engvanga tel ve nge i nih?
Chhanna: Kum 2000 hnu lama piang thalaite hian khuahkhirhna hi an duh lo. Mahni ngeia zalen taka thil tih chhin hi an duh a. Chu mi hnuah a that loh chuan a tha lo an ti mai a. Zalen taka khawsak duhna an nei deuh fur tawh a ni. Tunah chuan thuneihna lak a nih atangin kan zalen tawh lo. Khawiah pawh kali la, uicho ho motor hmuh tur a awm a, an hmel hmuh turin an awm reng bawk a. Chung avang chuan loh theih lohin ka rawn tel chho ve a ni ber mai.
Zawhna: Chutianga i rawn tel takah chuan 44 street-a thil thleng ang kha i tawn i inring em?
Chhanna: Ka ngaihtuah ngai lo. A chhan chu khawiah pawh kan tlan chhuak thei zel a, kan ngaihtuah ngai lo min man turin. 44 street inah khan Plan B tiin kan ngaihtuah ngai tawh a. In chungah tlan chho ila chu kan him vek ang. Mahse, thil a rawn thlen tak tak a, a saseh hunah chuan nung chunga inmantir kan duh lova, kan thi zawk mai ang tih rilruah a rawn lut a ni. Kei chu ka tlanna tur ka en a, kawngpuia uniform ho lovin min en avangin hmun dangah ka tlan ta zawk a ni.
Zawhna: Chutiang dinhmun i hmachhawn lai chuan engtin nge i awm?
Chhanna: Hetianga kan tih chuan kan tawng tur chu a nia. Min rawn man an tum a, min rawn that a nih chuan min hlauh vang ti an ni a. Chu chu mi tinin hria se ka duh a. Min hlauh vanga an tih awmzia chu thalaite inpumkhat zelin dodal duhna rilru an neih hi an hlau a ni. An hlauh avangin, thla hmasa lam atang tawhin a lu lam pangte chu zawngin an man zel bawk a ni.
Zawhna: A nih i rawn chhuah hnuah enge i rilruah awm?
Chhanna: 44 street-a ka u te kha ka hre reng thin. A chhan chu kan zinga awm ve Min Thitsa Aung chuan heti hian a sawi thin a, “Ka thian tha ka tihte pawh he Revolution-a ka chhungte angin ka ngaina tawh lo,” tiin. He kan inchhungkhatna hi engmahin tihchhiat a phal lo nib er mai. Chutiang chiah chu ka rilruah a awm ve reng a. Ka tlan chhuak a, ka him hnuah pawh ka hlim thei chuang lo. Mahse, thil tih tur tam tak a la awm a ni.
Zawhna: 44 street-ah khan eng thil chiah nge in tawn a, sipaite thuchhuah dan hi thu dik hmangin i chhang let duh em?
Chhanna: Military council te insawifiahna ring chu lehkhathiam pawh nise, thluak nei lo; thluak nei pawh ni se, lehkhathiam lo an ni ang. Thluak nei chin chuan military council thusawi hi an ring ngai lo a. An ngaihtuah hmasa phawt zel. Tun ang hunah thalaiten engvangin nge damdawi lam an khawih ang, an khawih a nih chuan an dai sual dawn tih an inhre vek tawh a. Mahse, damdawi hman sual vanga zuang thlaa min puh hi chu Psywar atan mai a nia. A chhan chu 44-a thil thlengah silaiin an kap thla a, a hnuaia la thi lo thaw tek tek pawh silai fawngin an chhu hlum zui bawk a, chung an thaibo theih nan a ni. Chhuahchhal duh hran pawh ka nei lo, ui ka atangin eng tawngkam tha mah a chhuak lovang.
Zawhna: 44 street thil thlenga tel ve Apple tia hriat Weiwi Myint kha engtin nge i lo hriat ve dan?
Chhanna: Kan pawl zinga kan u pakhat thian a ni a, u Apple-i chu hmeichhia mahni lu zo tak chi a ni. A fing bawk a, sum lamah pawh engmah mamawh dang nei lo a ni. Chutianga engkima felfai hmeichhia pakhat chu engvanga ui rilru pu a, sawichhe zui nge an nih ka ti a, heng sipai uicho ho hian nupui, farnu, nu an nei lo em ni. Min rawn beitu ber sergeant colonel Soe ngei pawh ‘I nu kha uire nu a nih kha’ tia post hial ka duh. Anni chuan nihna leh sum chiah an hmelh a, thil dang engmah an hmu tawh lo.
Chuvangin, u Apple-i kawng hrang hranga an sawichhiatna hian ka lung chu a chhe khawp mai. Mahse u Apple-i nihna chu a danglam chuang lova, anni nena khaikhin chi pawh a ni lo. U Apple-i chu NUG, CRPH te nan inzawmna a nei lo. PDF te nen pawh an inzawm lo. Keini a taka thil ti pawl hi a theih ang takin min tanpui a. Min tanpui thei lo a nih pawhin min puih theih loh thu a sawi mai. Hetiang hmeichhia hi tihmualpho an tum a. nei loh chuan a neih loh thu a sawi mai a. He revolution atanga ka zir chhuah tak chu police leh sipaiho hne awmzia hi a ni.
Zawhna: Sawi belh tur dang i nei em?
Chhanna: Ka sawi belh duh chu ‘Ka’ ven that a ngai a. Mahni hmakhua chauh en lo ila. Ka hi veng a lo har khawp mai a. Khawpuia kan chet tlat lai chuan thenkhatin attention (ngaihsak) nih an duh avangin, kawngzawhnaah man an tawh phah a. Chutianga mahni ka veng tha lo te pawh ka lo tawng tawh a. Chuvangin, ka ven that, attention ngaihtuah loh leh mahni hmakhua chauh en loh tur tih pathum hi ka sawi duh a ni.
