Yangon khawpui chhung fang kual thin Rel chhunga security leh police-te beihnaah tleirawl mi 5 te May 18 khan Insein Jail Court atangin thi tura an chung rel an nih bakah dam chhung lung in tang tura thutlukna an siam thu political prison pawl AAPP chuan May 18 khan an thuchhuahah an tar ang a.
Heng an man tak mi 5, Ko Kaung Pyi Sone (Kong Pih Song), Ko Kyaw Win Soe, Ko San Lin Maung, Ko Ze Yar Phyu leh Ma Myiat Phyu Pwint (Mah Miat Phiu Piut) te hian khawchhung Rel (Circular train) chhunga police-te an kap tia puhin Military council-ten thi tura an hrem bakah dam chhung lung in tang turin an hrem zui bawk a ni.
AAPP-ten an sawi dan chuan Ko Kaung Pyi Sone hian sorkar phal loh ralthuam leh a kaihhnawih thil ru-ah puhin Military council-ten kum 1949 ralthuam dan section 2/1 (A) leh ram tibuaitu dan section 54 hmangin thi tura hremna dan chhawng 2-in an hrem ta a ni.
A thian mi 4 te hi tualthah thubuai leh case dang section 302, 307, 114, 50, 54 (A) case leh kum 1949 ralthuam dan section 2/2 hmangin Military council-ten thi tura an chungthu an rel bakah dam chhung lung in tang turin an hrem thu AAPP-ten an thuchhuahah an tar lang bawk a ni.
Thi tura an chungthu rel te leh dam chhung tang tura hrem te, RFA Media-in an chhung te a zawhnaah eng mah chhanna a awm rih lova, he thil thleng hi a dik leh dik loh thu nemnghehna an la nei lo a ni.
Kum 2021 August khan Yangon Rail Station atanga Inseih khawpui pan mek khawchhung Rel chu A-Long Rel station a thlen dawn tepa beih a tawhnaah police corporal pakhat, police lance corporal pahnih leh police constable pathum an thih thu hriat a ni a.
He beihnah hian AK silai 2, G3 silai 1, BA-64 silai 1 leh ralthuam tam tak rawlrala che pawlten an laksak thu an thuchhuahah an tar lang a.
He thil thleng avangin Ko Kaung Pyi Sone telin mi 5 te hi mi firfiakah phuin kum 2021 September khan Military council-ten an man thu hriat a ni.
