NUG sorkar chuan Yangon region-ah Military council sipai do pawl zing atangin Yangon region-a rawlrala che pawl Battalion 5101 tiin June 1 khan an din thu an thuchhuahah an tar lang a.
Military council sipaite chet thatna hmunpuiah hetia NUG sorkarten Battalion din theih a nih hi NUG thupuangtu U Nay Bone chuan heti hiana a sawi a.
“Military council sipaite hmachhawn turin kan din a ni ber a, Bago, Mandalay, Ayeyarwadi (Ee Yar Wa Di) khawpuiah Battation din chhoh mek niin kawng hrang hranga hmanlak mek a ni a. Yangon khawpui tuam vek kan tum a, hetia Battalion kan din avang hian an rawn che na mai thei a, Battalion kan din loh pawhin mipuite hi hmelmaah an ngai tho tho a ni”
He Battalion 5101 hian Yangon region-a revolution beih nan ralthuam an mamawh hle dawn a, “Yangon tan enna” tih hming chawiin US Dollar 500000 chu June 1 atangin tanpuina an zawn tan dawn thu a sawi zui bawk a ni.
NUG sorkarten Yangon region-a Battalion a din hian mipui tan eng tangkaina nge a awm theih ang tia CDM officer Captain Ngyi Thu Kha, an zawhnaah
“Chin State-ah leh Kayin State bakah hmun hrang hrangah mipuite an la bei nasa hle a. Hetiang vek hian Yangon khawpuiah pawh a la thleng mai thei a. Chuvang chuan mipuite an lo him zawk nan hma kan la dawn a ni” tiin a sawi a.
He Battalion thar din chungchangah Military council thupuangtu General Zaw Min Tun, RFA Media-ten phone hmanga an zawhnaah chhanna a la awm rih lo a ni.
Military council sipaiten thuneihna an lak hnu hian Myanmar ram pumah PDF Battalion 300 chuang, Township 250-ah an din tawh thu NUG thuneituten an sawi thu hriat a ni bawk.
