Mon State, Ye township-ah February 8 atang khan curfew zan dar 6:00 atangin zing dar 6:00 thleng an pawh sei belh thu tualchhung mi te hnen atanga hriat a ni.
“February 7, atang khan chawhnu dar 6:00-ah an puang a, chawhnu dar 6:00 hnuah kawngah mi tu mah an awm tawh lova, chawhnu dar 5:30 atangin dawr an khar vek tawh. February 7, chawhnu dar 6:00 a rik hnuah Chaung Taw khaw lamah silai ri hriat a ni” tiin tualchhung mi pakhat chuan Mizzima Media a hrilh.
“Zing dar 5:00-ah kan Bazar tan a, police an rawn thleng nghal a. Ding vek rawh u, dar 6:00-ah chauh kan ti a ni lawm ni, seng vek rawh u an ti a, an vin khawp mai” tiin Ye khuaa mi pakhat chuan a sawi.
Tualchhung mi pakhat dang chuan “Zing atangin chawhnu thlengin tlang an au a, hna kan zawh loh avangin kan haw thei lo. Chawhnu lamah inneih ruai leh zanriah kilho pawh kan buatsaih thei tawh lo. Ramhnuaiah awm mah ila ral a muang thei bawk si lo, zan lamah silai ri kan hre thin” tiin Mizzima Media a hrilh a ni.
Ye township-ah a hma kha chuan zan dar 8:00 atangin zing dar 4:00 thleng curfew puan a ni a, February 8 atang khan section 144 hmangin zan dar 6:00 atangin zing dar 6:00 thleng an pawt sei ta a ni.
Military council ten an thuchhuah danah chuan security te tel lovin mi 5 aia tam awm khawm leh hmawlh, chem, ralthuam ken an phal lova. Tilui an awm chuan dan anga na taka an hrem tur thu an ziak tel bawk.
Military council ten February 2 khan Mon State, Ye township telin rampum huapa region 4 leh State 4-a township 37-ah Martial Law an puang a. February 8 atang khan curfew hun an pawt sei leh ta a ni.
