Sagaing region, Yinmapyin township, Tapyiaye khuaa pawisawi lo civil mi, hmeichhe pakhat chu sipaiten an kap hlum a, a ruang chu LIB 368-a sipai Win Tura, Maung Thu leh Kyawzinlat te pathumin pawngsualin mipat-hmeichhiatna an hmanpui bakah, khaw chhunga rangkachak, thil hlu laksakin puithiam school pawh an hal chhiat bawk thu military council sipai tlanchhe pakhatin a sawi chhuak.
LIB 368 atanga sipai tlanchhia chu Yinmapyin township-a tualchhung venghimtu pawlin an lo man a, ani chuan an LIB 368-a sipaite thil sual tihte a puang chhuak a ni.
Ani chuan, “Tapyiaye khua chu Chinpone khua atang a chinchang zawtin kan thianpa Than Thun Win-an hmeichhe pakhat chu a kap hlum a. A va en hnaiha a sam keua a en chian hnuin hmeichhia tih a hre chauh a, a hriat veleh, kan thiante dang Win Tura, Maung Thu leh Kyawzinlatte a hrilh a, en turin. Chutia an va en rualin mipat-hmeichhiatna an hmanpui nghal a. Condom an hmang a. Kei chu ka tel lo, sipai Win Tura, Maung Thu leh Kyawzinlat te an ni,” tiin a sawi.
Chutianga an thil tih chu an chaw ei laiin an sawi chhuak a, chuta tangin kei pawhin mitthi ruang an pawngsual tih ka hre ve chiah a. An sawi tan dan pawh, chaw ei tur ka lo khawrh laiin, ka bulah lo kalin pakhatin i kut kha a hrimchhe lutuk a, tih leh condom i hmang ve bawk si lova, tih te an sawi a. Kei chuan chawi dawnah chutiang rawn sawi teh suh u tiin ka lo sawi ve bawk a, tiin a sawi zawm a.
Sagaing region-ah LIB 368 sipaiten ration an hmuh that tawh loh avangin, mipui lamah laipui an kap puak a, puithiam school halin, khaw chhunga rangkachak leh thil hlu awm ang ang la chhuakin an khawsa deuh reng tih pawh chu sipai tlanchhuak chuan a sawi tel bawk a ni.
