Military council-in township 40 tih loh ram chhunga primary school zawng zawng hawng leh vek turin ruahmanna siam mah se, nu leh pa tam zawkin an fate school luhtir an duh loh thu hriat a ni.
November ni 1 atangin, region leh state 9-a township 40 tih loh ram pum huapa Buddhist puithiam school telin primary school zawng zawng chu hawng vek turin military council hnuaia Covid Control Committee-in thuchhuah a siam a.
Yangon khawpuia school naupang nu pakhat chuan, “Kan kaltir lo ang. Tun hmaa school an hawn pawh khan kan va luhtir chuang lo. Tunah hun a awm tawh lo. School pawh kal se, engmah an thiam chuang lovang,” tiin a sawi.
Chutiang bawkin, Ayawaddy region, Patein khuaa nu leh pate pawhin, “Kan luhtir lovang, hei khawpa dinhmun chhiaah, min tilui tlat a nih pawhin dam lohna chhuanlamin kan kaltir chuang dawn lo,” tiin a sawi bawk a.
Lashio tualchhung mi pakhat chuan, “A tih chhan chu International-ah ram chhung dinhmun a pangngai tawh tih an lantir duh vang chauh a ni. Naupangho hi school kaltir chi an ni em ni ti ila, an la ni lo. Covid pawh a rawn chhuak leh a. Naupangte tan a la rem lo a ni,” tiin a sawi a.
Hetianga school hawn tum a nih chungchangah thenkaht chuan tuna ram chhung buaina rilru lakpentir tumna lek a nih thu an sawi a. Chutih rualin school naupangte chu Guerilla attack atanga sipaite inphenna phaw ang lek an nih mai hlauhthawnna a awm bawk a ni.
Mahse, Rakhine lama nu leh pate chuan, “Kan hmun hma hi a zim a, kan kal lo nih chuan engvan nge tih a rawn ni dawn a. Mi dangte tih dan kan en phawt a ngai ang. He lamah chuan thil danga buaina a awm loh avangin sawi thiam a har a ni,” tiin a sawi.
Covid thawh thar leh vak laia military council-in school a hawntir leh khan Rahine school tam zawk chu pangngai takin an kal leh tih hriat a ni.
