Indo-Myanmar border, Zokhawtharah Myanmar refugee-te a thlawna inentir theihna tur Clinic pakhat chu May ni 18-ah Mizoram sorkar Transport & Forest Minister Pu JT. Lalnuntluangan a hawn thu hriat a ni.
Chu clinic chu Thawhtan leh Nilaithawhtan zing lam dar 9 atanga tlai lam dar 5 thleng, Thawhlehni zing lam dar 9 atanga chawhnu dar 1 thleng, Nilaini chawhnu dar 1 atanga tlai lam dar 5 thleng, Zirtawpni chawhnu dar 2 atanga tlai lam dar 5 thlenga hawn thin a ni a.
Inentir leh enkawl man chawi a ngai dawn lova. Chu clinic-a thawk turte chu Myanmar ram atanga CDM zawm doctor leh nurse te an ni.
Myanmar Refugee Relief Committee – Mizoram Secretary, S. Lalhuliana chuan, “Keini MRRC leh Mizo Zirlai pawl, US-a Chin civil society ten clinic tana mamawh zualpuite chu kan pe dawn a. Clinic-ah hian Ultrasound, Xray khawl a la awm lova. Chu mi atan chuan mi tlawmngai thawhlawm pe theite kan mamawh a ni,” tiin Mizzima a hrilh a.
Chu damdawi in (clinic)-ah chuan Mizoram sorkar-in a pek chhuah Refugee ID card neaten a thlawnin an inentir thei dawn a, tualchhung mite chu damdawi man zaa 50% vel chawitira enkawl theih a ni dawn bawk a.
Tuna hawn thar Zokhawthar Refugee clinic hi MRRC pawlin a vawi hnih nana clinic an hawn a ni a. February ni 12 khan Aizawl khawpuiah refugee-te tan out patient clinic pakhat chu Mizo Students Union (MSU၊ Chin Health Organization (CHO) leh BN Hospital te nen an lo hawng tawh bawk a ni.
Zokhawthar khua hi Indo-Myanmar ramri insumdawn tawnna gate no. 2 bula awm niin, Myanmar lamah Rihkhawdar (khawmawi) a awm a, tunah hian refugee 4000 chuang an awm mek a.
May ni 17 pawh khan Zokhawthar khuaa awm refugee-te tan MRRC pawlin buhfai bag 60, tel bawm 30, dal bag 20, Alu bag 20 leh pawisa fai Rs. Nuai 2 an hlan thu hriat a ni.
Kum 2021, February ni 1-a military council-in thuneihna a pawng lak hnuah Myanmar Myanmar ram atangin ratlan 40000 chuang chu Mizoram state lamah an tlan lut a. Chung refugee-te chu India central sorkar lamin official-a tanpuina pe lovin, hun engemaw chen a awmtir a. Mizoram sorkar leh tlawmngai pawlin theih tawp chhuahin an chhawmdawl a.
Tun dinhmunah chuan Zokhawthara refugee awm zat chu a dang lam reng a, Myanmar ramri lama inkahna a chhuah changing an tam a, boruak a that leh deuh chuan an khaw lam kir leh an awm bawk thin a ni.
