by J. Sangtea Chhangte
June ni 20 khan Sr. Gen. Min Aung Hlai chu Russia ramah kalin Russian Army General Sergei Kuzhugetovich Shoigu sawmna ang ngeiin International security affairs conference a vawi 9-na chu a zu chhim a, chawlhkar khat, ni 7 chhung a thang bo a, June ni 27 zan dar 11-ah Myanmar leilung, a lal thutthleng awmna Naypyidaw-ah him dam takin a rawn tum leh tawh a ni.
Russia ram leilung a rah laia an lo hmuah dan vel kha chu dah thain, a cham chhunga a dinhmun va luah han thlir ta thuak zawk ila. President Putin chu a hmu thei lo phawt a, a hmuh phak chinah Defense Minister niin, Russia sipai aiawh a ni ber a. Kawng leh lamah chuan Min Aung Hlai-an thuneihna a pawng lak hma lawk kumin January ni 22 khan Russian Defense Minister chu Naypyidaw-ah a zin a, Min Aung Hlai telin sipai hotu lawkte nen an inkawmho tawh a ni. Chu bakah kum 2020 November ni 3 khan ani chu Min Aung Hlai nen video conference-in an lo inhmu tawh bawk a.
Chuta an inkawmnaah chuan Russia Defense Minister chuan Min Aung Hlai chu Russia Military lam zirna University atanga Honorable Doctor nihna leh chawimawina a pek thu a lo hriattir daih tawh a ni. Tuna taka Russia-in a sorkar pawm a, Doctor nihna pe chawpchilh a ni lo a, mahse ani chuan tun lai boruak hun remchangah hmangin a va la te pawh chu a ni thei tho! Chutah ama ta tura thui ngei an han haktir chuan an lo teh sual leh tlat pek a, a kawr-chung chuan a ha hnup a, fiamthu thawhna ni lo mah se, mipui tam tak hmuhnawm a tling pha. A hmun hma vel han en reng reng pawhin a ropui teh chiam lo a; ralthuam lama an Customer kum hlun leh point emaw downline emaw hmu tam ber an lo chawimawina ang vel lek a ni ber e.
Russia rama a cham chhung khan a hmuh tawh hnu defense minister ho bak hmuh belh a nei lova, Russian Federation sorkar hruaitu tak takte pawh a hmu phak lo a ni ber. A nihna takah chuan, Min Aung Hlai chu tun dinhmunah Myanmar ram sorkar hruaitu lu ber a ni a, chuvangin, a level puia a ngaih ruk ve, Russia president Putin chu hmuh a duh hle ang tih hriat sa a ni. Mahse, Putin-an hmuh a tum tlat lo. Tun hnaia Putin-a hmaah ngaihdam dil ni awm taka a thingthi lai video/thlalak vel kan buaipui vak kha chu la dah tha rih ila.
Chawlhkar khat dawn a cham chhung pawhin Putin-a nena an inhmuh thu hi khawvel chanchin bu/media rintlak pakhat mahin an tarlang lo. A awmzia chu Myanmar sipai sorkar chu an pawmpui tak tak lo tihna a ni ber a. Aung San Suu Kyi zin lai boruak nen chuan a inang lo leh pek hle a ni. Mahse, sipai hotu ang chuan an lo pawmin an dawngsawng tha hle a, ram hruaitu lu ber ang chuan an pawm lo thung.
A cham chhunga Myanmar rama thil thleng dang lam tak nia an sawi te chu sipai General Soe Win-an thuneihna a la, Yangon-a Soe Win-a leh Min Aung Hlaite chenna in velah sipai security an awm khat tlat, sipai General nupui fanaute Sagaing tlang (buddhist zirna in leh puithiamho chenna hmun) lamah an tlan chhia, Satigu Sayadaw (sipaite biak rawn ber puithiam) pawh a chennaah a awm lo tih leh Yangon, Thaketa township lamah sipaiho parachute-a an uai thla hmuh a ni tih te a ni a.
Yangon khaw chhung, Thaketa lama sipai parachute-a an uai thlak nachhan chu khawmual lam kawnga ral beih harsatna hmun a nih tawh avangin van boruk lam atanga beih tuma zuang thla, chu pawh an hre tlai mah mah tawh a, chu lai hmunah chuan PDF pawl chauh ni lo, pawl dang pawh an lo awm tawh mai thei an ti. An ngaihruat zawm zel dan chuan chu lai hmun chu Yangon tuipui luh chhuah theihna a ni a, chu mi atanga mel engemaw zatah US Ronald Reagan indo lawng lian a awm a, chuta tang chuan US sipai an rawn put lut tawh em ni, a tih theih rum rum a ni. Ram chhung dinhmun inthlak thleng dawn ta tia chanchinbu lama han ziah mai a chakawm hman asin.
Mahse, thenkhat sawi dan chuan Gen. Soe Win-a leh Min Aung Hlai-ate chenna in vela sipai punkhawmna chhan chu sorkar function pawimawh pakhatah Soe Win-a kal a tum vanga security sang ber pek a lo ni awm e. Thaketa lama parachute uai vel chu khawpui chhunga ralrel dan tur inzirna an nei chho va, tum dang ang lo takin an ti kual vel niin sawi a awm leh daih a. A eng zawk nge chaw tak khuka khuk pui zawk tur tih pawh hriat thiam a har sawt hle a. Suangtuahna khawvelah ngaihruatna thu mei bul ka la um zel dawn chu a ni phawt a.
Chutih laiin Min Aung Hlaia thlawhna Myanmar ram lam pan lai chu Russia lam let zawngin a lo thlawk kual leh vei rawl bawk nen, sawi tur a titam ta hluai bawk a. Media lamin a tirah a thil ei sual vang an ti a, a thenin khaw chhiat lutuk vang an tih laiin, thenkhatin Russia-in a boruak chin a pel a nih chuan mawhphurhna a lak loh tur thu a hrilh hnuah US radar-in a chuanna thlawhna man fuh a, an kah dawn tepah lei lam atanga report an dawn hman avangin, an rang a rangin an let leh a, a hlau thawng chuan Russia ram chhungah a thlawk kual vel mai mai ni awma an sawi rualin; thenawm pa chuan ralthuam siamna dang an va tlawh leh duh vang alawm le a ti sam et a. Buk tling lovin thu chu a saisa nuaih mai a ni.
Chu mai pawh a la ni law, US President-in Russia sorkar hnenah ruihhlo kaihhnawih thuziak a thawn avangin, Min Aung Hlai-a hmai inphihfai tum lutuk leh hlauthawng chuan Myanmar ram chhunga ruihhlo, dollar maktaduai engemaw zat man chu a hal raltir mai bakah, Russia President hmaah thingthiin ngaihdam a dil hial niin video nen lam media thenkhatah tarlan a ni a. A video kha a genuine chiah em tih lam chu chhu zui tawh lo mai ila. Thingthi-a a lo zu hmu a nih hlauh pawhin atan chuan khawvel hriata puanzar tham a tling hrim hrim – MRTV vel talah pawh kan lo hmu em aw (?) NUG lam lahin sipai sorkar chu ram dangin an pawm loh thu leh NUG chu ASEAN ramin pawma an inbiak pawh reng thu an lo puang chhuak ve bawk nen, Myanmar khua leh tuite tan kar hmasa weekend kha chu kawl a eng zawr zawr a ni ber e.
Russia RIA-in a interview-naah chuan khaw thlang ram (western union)-ten Myanmar ram chu tihchhiat tumin ram thuneihna chu an thununna hnuaia mite hnena dah tuma an beih thu leh Asia-Pacific hmuna hlauhawm ber chu ram chhung inrelbawlnaa lo inrawlh nena inkaihhnawih hi a ni a ti a. Myanmar rama politics lama harsatna thleng reng chungchangah inthlan hmasaa dan bawhchhiatnate chhui fel zawh a nih hunah inthlanna chu a rang thei ang bera buatsaih a ni ang tia rualin, Inthlannaah political party zawng zawng an tel thei ang a, inthlanna (election law) dan chu tihdanglam a ni lovang tiin thu a tiam a.
State counselor Daw Aung San Suu Kyi man a nih chungchangah rorelna court chuan a chungthuah thutlukna a siamsak ang, tiin Min Aung Hlai chuan a sawi a. Min Aung Hlai hian Russia security lam kaihhnawih conference-a a tel mai bakah ralthuam lei dan kawng dapin Russia thuneitute nen an indawr tih kan hriat tawh baka, a thil tih tha ber nia sawi lan chu Myanmar ram tan Russia siam Sputnik V Covid-10 invenna (vaccine) maktaduai 2 vel lei tuma a en thu hi a ni. A lei tak tak dawn nge, lo lei ta cheng pawh ni se, mipui mimirin an chang ve ang em (?)
Mahse, tunah chuan Min Aung Hlai-a chu him dam takin a awmna hmun a thleng leh tawh a. Russia ralthuam tha mi nghak leh a duh duh kawk kualin hun a hmang chho leh mek a, a ralthuam tharin eng pawi tak khawih chho leh ang maw tih chu khawvel media rintlakte thlir a ni leh daih tawh a. PDF lam pawhin US nghak lovin, an tih tur an tichho zel a. Myanmar military council sipai nuai 3-4 vel aiin mipui nuai 50 an tam zawk tih an hriat chian rualin, Vietnam mipui pawhin US ralrel thiam sipai an tudawl thei tih pawh an hai lo a. Chuvangin, a ngaihnawm zawng ringawt um lovin, a tak zawnga a tak rama chen a hun tawh a, ni tla tur hnung zui reng chuan ni chhuak tur kan hmu ngai dawn lo tih pawh hriat a tha awm e.
