Sagaing region, Monywa (Mung Zua) District, Ayadaw township, Ta Le Ba khuaah January 28 khan Military council sipai ten In 100 chuang an hal chhiat hnuah puithiam pakhat telin tualchhung mi 10 an thah thu tualchhung tlawmngai pawlte hnen atanga hriat a ni.
“January 28 tuk khan pawl hming hriat loh te an rawn lut a, puithiam pakhat telin tualchhung mi 10 an that a. A hnuah township security te an punkhawm laiin khawchhung an kah chiam hnuah In 110 chuang an hal” tiin Ta Le Ba khuaa mi pakhat chuan a sawi.
Heng an tharumthawhnaah Ayadaw township-a security hnaivai pakhat chuan “Puithiam Ngyolawkapala (Ngiu Law Ka Pa lah) inserh lai telin mipa 7 leh hmeichhe 3 te an that a, security ten an bawihsawm nghal” tiin a sawi zui.
He chhiat tawhnaah hian tu te pawl nge, eng vanga thah nge an nih hriat a nih loh thu VOM media ten nemnghehna an la nei lo.
Ayadaw township-ah nikum 2022 atangin kumin Janaury thla thleng khan tualthahna tum 80 chuang a thleng tawh a, mi 130 chuang an thah tawh thu hriat a ni.
Janaury 25 pawh khan Sagaing region, Swebo (Sui Bu) township, Ko Doh Seih khaw kiang, tlang karah leilet neitu mi 9 a rualin an that tawh a.
Hetiang vek hian Sagaing township, East San Swe (San Sui) khuaah January 22, tuk pawh khan chhungkaw pakhata mi 4 an that tawh bawk.
Kanbalu District, Kanbalu township, Nga Myaung (Nga Miaung) khuaah Janaury 14, zing dar 1:00 velah leilet neitu chhungkhua an kahnaah kum 6 mi naupang pakhat telin mi 8 an kah hlum thu Nga Myaung khuaa tualchhung mi pakhat chuan a sawi.
