Bangladesh, Cox’s Bazar district, Ukhiya khuaa Balukhali camp, March 5, Sunday chawhnu 2:40 khan kangmei a chhuah thu Ukhiya kangthelh pawl thuneitu Emdadul Haque kal tlangin AP news chuan a tarlang.
He kangmei chhuakah hian chenna in 2000 chuang a kang ral a, mi 200 chuang chin hriat lovin an zawng mek a. Bangladesh UNHCR ten an twitter-ah camp No.11 kangmei a chhuah chungchangah tlawmngai pawl ten an buaipui thu leh UN Agency pawl ten an tanpui dawn thu an tarlang a, thil kimchang erawh tarlan a la ni rih lo.
He kangmei hi darkar 2 chhung a kang a, school, clinic leh Bali 90 a kang chhe vek a, chenna in nei lo mi mangang mi 12000 chuang vel an awm thu an zinga mi pakhat chuan a sawi a ni.
Rohingya raltlan camp kangmei a chhuah chungchangah a rapthlak thu AP News chuan a tarlang a. Myanmar atanga Bangladesh-a raltlan mi maktaduai khat an chuang tawh a. Heng zingah hian kum 2017 August thlaa Rakhine State hmar lamah Myanmar Military council ten khawchhung then fai hna an thawhnaah in leh lo tlansan mi 740000 vel an awm tawh a ni.
Tun dinhmunah hian Bangladesh-ah Rohingya raltlan mi nuai 9 chuang an la awm mek a. Myanmar Military council ten Rohingya mi te haw kir leh tura an sawi lai mek laiin Rakhine State-ah boruak a la sosang mek a ni.
