Chin State, Kanpalet township-ah Military council sipaiten ralthuam lian nena an rawn beihna turah, a chhan lehna atan ralthuam leh a kaihhnawih, ei in bakah an mamawhte tanpui turin CDF-Kanpalet-ten an ngen thu an tlangau a.
Military council sipaiten pawl 2-a inthenin July 16 atang khan Magway region, LoneShi khua atangin Kanpalet township Cindwe (Chin Dui) khuaah Military council sipai 300 rualten Trank 2, JCV motor 1 leh sipai motor chuangin an bei a.
Military council sipai pawl 170 rualten July 19 atang khan Magway region, Saw khua atangin Kanpalet khuaah an bei nasa hle bawk a ni.
July 14-19 thleng khan LoneShi khua leh Cindwe khuaah Military council sipaite leh CDF tangrual pawlte an inbeihnaah Military council sipai 20 vel an thi a, hliam tam tak an awm thu hriat a ni bawk a.
Thi leh hliam tuar tam tak Military council sipaiten MaSatui khuaah July 18 khan Jet Fighter 4-in vawi 20 chuang an bomb-naah BCM Biak in telin chenna in 7 an bomb chhiat thu hriat a ni a.
He inbeihnaah hian CDF sipai pakhat a hliam na hle a, mi 2 erawh na vak lova an hliam thu hriat a ni bawk.
Heng avang hian Chin State leh Magway region ramri-a tualchhung mipui 3000 an raltlan a, heng zinga raltlan mi 2000 vel te chu Kanpalet township huam chhungah an awm a. Raltlan thenkhatte chu dam lohnain a tlakbuak bakah damdawi an mamawh hle a, ei in leh tawm hulna In chung khuh an mamawh hle thu hriat a ni bawk.
