Chin state chhim lam Mindat khuaah October ni 31 khan CDF-Mindat pawlin an lambun avangin, firfiak sipai 3 an thih thu hriat a ni a, chu chu Thantlang khua an hal avanga phuba lakna a nih thu CDF-Mindat lamin thuchhuah siamin an sawi a ni.
Chin state chhim lam Mindat khuaah October ni 31, tlai lam dar 3 vel khan khaw chhung Si-Cheh junction-a duty sipaite chu CDF-MINDAT lamin lo changing an kap a, darkar chanve vel an inkah hnuah sipai 3 thiin, 8 vel an hliam thu CDF-Mindat lamin an sawi.
CDF-Mindat lama thupuangtu Ko Yaw Man chuan, “A tirah chuan hun remchang zawnga, ruahmanna nena kah tum kan ni a, mahse Thantlang chungchanga a rawn chhuah takah chuan beih let nghal vat a tha ang tiin a tlai hmain, kan thawk chhuak ta a ni. Darkar chanve vel chu kan inkap tawn a, keini lamah chuan silai mu kah thawi hliam pakhat a awm a. Anni lamah chuan sipai 8 vel an hliam a, 3 vel chu an thi bawk a, an ruangte chu an hnuk sawn a ni,” tiin a sawi.
Chu inkahna zawhah military council sipaiten laipui hmangin an tawng pawng kah leh vak a, Si-cheh junction bula biak in pakhat leh chenna in pakhat chu an kap chhe bawk tih hriat a ni a.
Hei hi October ni 29-a Thantlang khuaa thuneihna latu military council sipaiten biak in 2 leh chenna in 164 an hal chhiat thung rulhna a nih thu CDF-Mindat chuan an sawi bawk a ni.
