May 11 zing dar 1:00 vel khan Military council sipaiten Jet Fighter-in CDF-Senthang camp hmunpui an bomb a, he an beihna avang hian Halkha leh Matupi kawng khar lailawk a nih thu hriat a ni a.
CDF-Senthang camp hmupui leh Khuapi khua Military council sipaiten Jet Fighter-in vawi 2 an bomb thu CDF-Senthang thupuangtu chuan heti hian a sawi a.
“May 8 khan vawi khat an rawn bomb a, a ni 3 hnuah an rawn bomb nawn leh a, an la bomb leh pawh a ni mai thei, sawi theih a ni lo. Hetia an bomb avangin inven nan tiin kawng kan khar rih a ni” tiin a sawi a.
Hemi tuka Military council sipaiten an bomb chungchhang inbiak pawhna a harsat avangin tualchhung mipui thi leh hliam zat hriat theih a nih rih loh thu a sawi zui bawk a ni.
Hetia Military council sipaiten bomb an thlak avangin May 11 atang khan Halkha khawpui leh Matupi khawpui inkal pawhna kawng khar lailawk a nih thu CDF-Senthangten an thuchhuahah an tar lang a ni.
CDF-Senthang huam chhung Khuapi khuaa CDF-Senthang Headquarters chu May 8 khan Military council sipaiten Mi-35-in an bomb avangin CDF-Senthang Asst. General secretary Salai Siang Cung Hnin leh company commander Salai Duh Lian Hmung-sten ram tan an nunna an hlan tawh bawk a ni.
