Magwe region, Chauk khawpui No. 15 Ward-ah Islam mi te an inkhawmnaa lawmman an hlan haw lama mi 2 telin Islam sakhaw hruaitu 15, March 18, chawhnu 8:00 khan Military council sipai ten an man thu tualchhung mi ten an sawi a ni.
Heng an mi man te hi mikhual nia an in-report loh avangin an man a, mi 2 an chhuah hnuah mi 13 an la chhuah rih loh thu Chauk khawpui, security zinga hming thup pakhat chuan RFA Media a hrilh a ni.
“Mikhua in-report loh case avangin mi 15 an man a, Mi 2 an chhuah tawh a, anni hi Taung Dwin Gyi leh Magwe mi te an ni” tiin a sawi.
Military council sipai ten Chauk khawpuiah in tin lut chhuakin mikhual an check a, mikhual naupang leh puitling, hmeichhia pawh zuah lovin an man nual thu tualchhung mi te hnen atanga hriat a ni.
Heng an man te zingah khawpuia mi hausa te an tel nual thu Chauk khawpuia tualchhung mi pakhat chuan a sawi a ni.
“Mikhual an check-naah hian Islam mi hausa te an awm nual a. Mikhual in-report an awm angin report loh pawh an awm nual a, in neitute chawpin an man vek” tiin a sawi a ni.
Heng an man te hi khawi hmunah nge an hruai hriat an ni lova. Rohingyi telin Islam sakhaw mi te, hman atangin an la dim lo hle a ni tiin Society of Enlightening Quranic Knowladge chairman U San Aung chuan RFA Media a hrilh a ni.
“Myanmar-ah hetianga Islam sakhaw mi te an hnuaichhiahna hi tun chauh pawh hi ni lovin hman atang tawhin an en hrang tawh a. Entirnan, Rohingya te , Rakhine (Arakan) State-a Muslim te pawh ram mi nihna ID an neih loh avangin hmun hrang hrangah veivah an khap a. Myanmar mi ten tun thlengin an la en hrang reng a ni” tiin a sawi a ni.
Tun dinhmunah dan dinglai angin Islam sakhaw mi te ram mi nihna pawm an nihna chungin Chauk khawpuiah an la man a. Islam sakhaw mi an nih avanga an man a nih chuan thil tha lo tak a ni tiin U San Aung chuan a sawi a ni.
Hemi chungchangah Magwe region, police officer RFA Media-in a zawhnaah chhanna a la awm rih lo a ni.
