Chin State, Halkha township, ChhawnChung khuaah CDF te leh Military council sipaite an inkap nasa hle a. Military council sipai ten April 12,13 khan Thlawhna hmangin an beih thu hriat a ni a.
April 12 chawhnu dar 2:30 vel khan Halkha khawpui leh ChhawnChung khaw inkarah Military council sipai ten Thlawhna hmangin vawi 8 an bomb thu tualchhung mi pakhat chuan a sawi.
“April 12, chawhnu khan Jet Fighter pakhatin Halkha leh ChhawngChung khaw inkarah an bomb a. Halkha khua atangin kan hmu thei a, vawi khat an bomb hian bomb 2 an thlak a, vawi 8 an bomb lai kan hmu” tiin an sawi zui bawk.
April 13 pawh khan ChhawnChung khuaah inkahna an chhuak leh a, zing dar 11:40 thleng vel khan Military council sipai ten Jet Fighter pakhatin an bomb thu hriat a ni.
April 11 khan Kalaymyo atanga Military council sipai operation chho mek te Halkha khua atanga mel 17 vela hla ChhawnChung khua an thlen hnuah chenna in 20 vel an hal kang a.
Kalaymyo atanga chhuak Military council sipai motor 30 te ChhawnChung khua an thlen hnuin motor 10 pawh a awm tawh loh bakah thir phaw motor pakhat pawh a kang chhiat thu an sawi a ni.
He inbeihnaah hian thi leh hliam zat chungchangah Chin Journal ten nemnghehna an la nei rih lo a ni.
