India, Myanmar leh Bangladesh ram 3-ah Chin, Lushai, Kuki tiin Zofate min then darh a, rorelna pakhat hnuaiah kan insuihkhawm leh dawn a ni tiin Zofa Inkhawmpui Lian chuan resolution an siam thu hriat a ni a.
Zo hnahthlak zawng zawng te insuihkhawmna tur Zofa Inkhawmpui Lian chu May 26,27 khan Zo Reunifization (ZORO)-te huaihawtnain Aizawl khawpui Vanapa Hall-ah buatsaih a ni a.
Chin, Lushai leh Kuki te hi te unau chhul khat chhuak vek kan a ni a, British-ten then darhin India, Myanmar leh Bangladesh ramah te min awmtir thu an sawi a.
British colony-te hian an ram zauh duh avangin an pawng lak zel a, hnam khat unau ni reng chung si hian India, Myanmar leh Bangladesh ramah te min then darh chhunchangah an lungawi loh thu he khawpui lian hian a sawi a.
British colony sorkar hian kum 1892 February 25-29 khan India Kolkatta khawpui Fort William-ah Chin-Lushai Conference an neihnaah Chin Lushai Kuki Zofate zawng zawng an awp vek thu an nemnghet a.
Hetia Zofate ram luah chin hi tuna Mizoram chin chauh hi a ni lova, British-in an lo hman thin Divide & Rule an hman avanga awlsam taka min awpbeh theih nan zofate kan awmna theuhah kan hnam hming min phuahsak a. Chutianga a hrana hming hran puah a puttir luih kan nih avangin hnam dangte chu sawi loh keimahni ngei pawh hi mihrang emaw kan inti lek lek tawh a ni.
Aizawl Vanapa Hall-a Zofa Inkhawmpui Lian an buaisaihnaah hian Zo hnahthlak hmun hrang hrang atanga palai te an kal tha hle a, zai thiam leh hnam lam te entir a ni a. Mizoram, MP Rajya Sabha Pu K. Vanlalvena te, ZORO hruaitu te, NUG hruaitute zinga Dr. Ngai Than Maung te, Chin State CM Salai Lian Luai te, ICNCC hruaitu Salai Isaac Khen leh mi pawimawh te an tel nual thu hriat a ni.
Palai kal khawm leh mipuite kal khawm te hian he function-pui an neih hma May 17 tuk khan Aizawl khawpui Millennium Center Building hmun atangin Vanpa Hall thleng, “Zofate inpumkhatna” tia au-in kawng an zawh thu hriat a ni bawk.
