MOCHA thlipui avanga Chin State-a chhiatna thlen dan leh tanpuina tur kawngah hma an lak dan Khonumthung Media-in Chin National Counsultative Council (ICNCC) hruaitu zinga Salai Isaac Khen-a an interview chhunzawm lehna
Zawhna: Tanpuina leh chhawmdawlna chungchangah engtia hmalak nge in beisei?
Chhanna: MOCHA thlipui a tleh hma hian ICNCC leh NUG sorkarte tangkawpin township tinah Kyats nuai 25,30 vel inven nan kan pe lawk tawh a. Kan pekna chhan chu thlipui a tleh hun vela inbiak pawh theih nana ruahman ber a ni a. Hetia an chanchin kan hriat zung zung theih chuan inpuih theihna leh a tul anga hmalak theih a nih dawn vang a ni a. Tunah pawh hian chhawmdawlna tur kawng zawn mek a ni a.
Zawhna: Tun dinhmuna tanpui in tumnaah hian eng ang harsatna nge in tawh mek?
Chhanna: Harsatna kan tawn chungchangah sawi thiam a har khawp mai. Inkal pawhna kawng a la tha lova, Military council-ten Tower an tichhiat nual avangin phone-a inbiak a theih lova, a bik takin Paletwa township-ah phei chuan eng mah a biak pawh thei lova. Township hrang hrang leh thingtlang khaw hrang hrangah phone leh internet a hman theih lova. Cyclone thlipui tleh hma pawhin inveng lawk tura hriattirna pawh kan hrilh lawk thei lova, kan tlawh thei bawk si lo, harsatna kan tawk nasa ve khawp mai.
Kan harsatna chhan te chu: 1-naah chuan inbiak pawh a tha lova, 2-naah security leh Military council-ten khawmual lamah an chet avangin sawi lawk thei a ni lova. Mindat township-ah pawh May 13 khan chung lam atangin an bomb a, heng avang hian kan tlawh thei lo a. A 3-naah chuan zalen taka tanpuina thawn kan duh a. Chhawmdawlna thawn dawn mah ila, eng tin nge kan thawn ang, an mamawh Buhfai leh In chung khuhna bakah hmanraw hrang hrang, silhfen leh sum leh pai te hi khawi atangin nge kan dawn ang, eng tin nge hma kan lak ang tih hi kan harsatna lai tak chu a ni.
Zawhna: Heng chhiatna te hi engtia tun din leh nge in beisei le?
Chhanna: Heng chhiatna te hi tun din leh siam that a nih dawn chuan a hmasa berah sum hmuh dan hi kan harsatna ber chu a ni a. Inkal pawhna kawng chungchangah leh In sakna chakkhai thliar luh chungchangah pawh hian Military council sipaiten min vau reng bawk si a. Eng tikah nge an rawn luh dawn tih kan hre lawk si lova, chu bakah an ram humhalhna hmuna an puan Paletwa, Matupi, Halkha leh Tedim township-ah an officer liante an dah nual bawk si a. Chuvang chuan Military council sipaite hian chakkhai leh chhawmdawlna chungchangah hma an lak a rinawm hial zawk a ni.
