Sagaing region, Kalaymyo atanga Chin State-a lawn chho ration phur Military council sipai Motor 4-te CDM Siyin ten Hiangzing khaw bulah April 24 tuk khan bomb kam hmangin an bei a, Military council sipai 4 an thi nghal a, mi 4 an hliam a; tualchhung mi pakhat a hliam thu CDM Siyin, Chief Staff hnen atanga hriat a ni.
“Bomb kam No.2-a kan tipuahnaah mi 4 an hliam nghal a, Military council sipaiten hma lam an rawn nawr leh a, vawi khat kan hmet leh zeuh a, hemi tum hi chuan Military council sipai 4 an thi nghal a, chu bak hriat zui kan nei lo” tiin a sawi.
April 19 pawh khan Kalaymyo atanga Chin Hill lam Taingen, Canady camp leh Tedim khawpui chhung, Military council sipai camp-a ration pe tur Military council sipai 80 vel chuanna Motor 4 te kawng tluanin CDM-Siyin ten rawlrala chein an lo bomb tawh a.
Canady tlang leh virthli (Li Than Kong) tlang inkarah Military council sipaite leh CDM-Siyin-te an inkahnaah Military council sipai 9 an thi a, hma lam pan thei tawh lovin a hmunah an riah thu hriat a ni.
An kah hlum tak Military council sipaite ruang hi Military council sipaiten Taingen khua leh Hiangzing khuaa tualchhung mi hmeichhia telin mi 20 te manin indannaah an hman hnuah an thiante ruang an thliartir thu hriat a ni bawk.
Chin State-a Military council sipaite an chhoh chhung hian Kalaymyo leh Tedim kawngah mipuite veivak lo turin PDF ten an thuchhuah zawm turin an ngen a ni.
“Revolution a zawh hma loh kan bei zel dawn a, kan thupek anga Motor kawnga kal loh tur kan tih chuan kal loh a hlim ber a. Mipui ten an pawi lo ang an ti thin a, a rukin bomb kan kam si a, palh a awm chuan thil pawi tham a ni a, an kal lui bawk sia. Military council sipai kalna tur kan danna a ni a, fimkhur a tha khawp mai” tiin CDM-Siyin-a thuneitu pakhat chuan a sawi a.
Tun dinhmunah hian Military council sipaite leh PDF te inkahnaah PDF lamah thi leh hliam an la awm rih lova, a hnuah Military council sipaite a kir leh thu hriat a ni bawk.
