Ai-dak tlang dunga raltlan mipuite chu a thla tela an awm tawh avangin, ei tur leh damdawi lam, an thlachham a, fur ruah tui a tlak tan avangin silpaulin, puan leh thosilen an mamawh hle bawk niin raltlan tanpuitu pawla thawk pakhat chuan heti hian a sawi.
“An mamawh chu ei tur, damdawi bakah damdawi hria, nurse te an mamawh a. Chu bakah silpaulin, puan, a theih chuan thosilen pawh an duh a. Tunah fur a ni chho a. Operation a vawi khatnaa tlan chhiate an nih angin engmah ramhnuaiah an keng thei lova. An thil neihte chu sipaihovin an ruksak vek a ni. An harsa tak zet a ni.”
Matupi township-ah ni kum 2021 October thla atangin CDF-Matupi leh military council sipaite inkara inkahna avangin Mindat-Matupi kawng tluan leh Ai-dak tlang dunga awm khaw mite chu ramhnuaiah an raltlan a ni.
Chutianga ramhnuai lamah raltlana an awm laiin, kum 8 mi naupang pakhat telin mi 6 lai an lo thi tawh a. Tun dinhmunah raltlanten ei leh barna kawngah an harsat hle thu raltlan tanpuitu pawla mi pakhat chuan heti hian a sawi.
“Tun dinhmunah raltlante chu ei leh bar kawngah an harsa hle a. Tun thlengin tanpuina thawhlawm an la hmu lo. An thil neih ang ang insemin an la ei a. Tun chawlhkar khat atan tlem a zawng chu an la neih a rinawm tih a ni. A kar leh lam atan chuan ngaihtuah theih a ni lo.”
Chin state chhim lamah military council sipaiten force tam tak hmangin operation vawi thum an nei tawh a. Sipaiho kalna kawnga chenna in tam tak chu hal chhiat a nih vangin, raltlan tam tak chu haw duh mah se, hawna tur in nei lovin an awm mek a ni.
Tuna raltlan khuate chu Champian kawh pakhatna leh pahnihna, Ram Tlei khua, Mon Tun khua, Haltu khuate niin, raltlan mi 1370 vel an awm a ni.
