Chin State, Halkha Township Atanga Thantlang Kalna, Timit Lui Chhehvelah Military Council-te Leh CDF-te July 30 Atangin August 2 Thleng, Ni 4 Chhung An Inkap

Halkha khawpuia buk khuar, Military Council-te chu July 27 atang khan Halkha khawpui atanga mel 7 vela hla, Halkha-Thantlang inkar Timit Lui lam pan mek Military Council-te chu July 30 atang khan CNA, CDF-Zophei, CDF-Hakha, CDF-Thantlang tangrualte nen a inkap a.
 
He inkahna hian Halkha khawpui Runtlang-a Military Council Camp, Battalion 226 leh Independent Lungdawh atangin ralthuam lianin an sai nasa hle a. a puak ngun khawp mai tiin Halkha khawpuia tualchhung mi pakhat chuan a sawi.
 
“Ni 30 atang khan vawiin thlengin an la kap reng a. Nimin khan Military Council ten ralthuam lian tum 30 vel an tipuak a. Ralthuam lian an hmang nasa khawp mai, vawiinah pawh tum 6 lai an tipuak bawk”
 
Military Council-te leh Chin PDF tangrual pawlte hi August 1, tlai lam dar 2:30 vel atangin zan lam dar 8:00 thleng an inkap a. August 2 thleng an inkap chhunzawm a, he inkahnaah hian Military Council lam thi an awm nual a, a zat chiah hriat a ni lo.
 
Chutiang vekin August 2, tlai lam dar 3:00 hnu vel khan Halkha khawpui, Pyitawta (Pi Taw Ta) Veng, Myoma (Miauh Mah) Police Station velah silai ri hriat tur a awm bawk.
 
Military Council ten Timit chhehvelah buk khuarin an inpuahchah nasa hle avangin Halkha leh Thantlang inkarah mipuite veivak lo turin Chin PDF tangrual ten thu an chhuah a, inkahna a thlen natsat mai theih rin a ni.