Phone signal a awm loh avangin inbiak pawhnaah leh sumdawnna thilah harsatna an tawh bakah hlohna tam tak an hmachhawn thu Kalaymyo tualchhung mi, hnathawhnaa hotu pakhat chuan heti hian a sawi.
“Phone signal a that lai chuan a inbiak pawh zung zung theih a. Pawimawhna thilah leh hnathawhna tin rengah bungrua kan chah thleng thei a. Phone hman theih loh a nih hnuah chuan mahni ngei lirthei hmanga kal a tul tawh a, petrol a hek a, kan hah bawk a, thiltih a muang bawk a ni.”
Tun hnai lawk atang khan MPT leh Telenor signal a awm lohna hi chawlhkar khat a ni tawh a. Ooredoo hman pawhin duh angin a hman theih loh a.
Phone signal a awm loh avangin Data hmangin internet pawh a hman theih lova. Wifi hmang ve ve te chauhin internet an hman theih thu hriat a ni.
Chin State hmar lam, Halkha khawpui, Falam khawpui leh Tedim khawpuiah pawh Phone signal a awm lova. Wifi hmang te pawhin internet a muan avangin inbiak pawhnaah harsatna an tawh thu tualchhung mi te hnen atanga hriat a ni a. Tedim khawpuia tualchhung mi pakhat chuan heti hian a sawi.
“MTP leh Telenor signal a awm lova, Ooredoo signal chauh a hman theih. Chu pawh chu, duh anga a hman theih loh avangin harsatna kan tawk a ni.”
Kalaymyo leh Chin state chu military council sipaite leh mipui venghimtu pawlte inbeihna hmun pui ber zinga mi a nih avangin, military council lamin mi tam zawk hman phone line chu a titawp niin tualchhung miten an sawi.
