Myanmar rama Covid dona kawnga damdawi lam mamawh lei nan dollar nuai 2 thawh (donate) an tum thu Cambodia Prime Minister Hun Sen-an a sawi a.Hman ni deuh khan Sr. Gen. Min Aung Hlai chuan, “Mipui maktaduai 50 chuang tana ram dang damdawi lei chu ram pum retheihna hmabak chiah a ni.
Chuvangin, invenna, inenkawlna hi nakina kan tih loh theih loh tur a ni a, nakinah chuan invenna leh inenkawlna tur damdawi hi kan siam chhuah a ngai a ni. Kan traditional medicine hmangin kan siam chhuak ngei ngei tur a ni,” tiin a lo sawi tawh a.
Kawng lehlamah chuan mipuite nuna venhimna leh enkawl nan sum chuti zat a tam kan hmang thei lo a tihna tluk niin, mi thiamte chuan an sawi a. Mahse, he Cambodia tanpuina hi chu Cambodia leh Myanmar ram pahnihte inkara inthian thatna leh inpumkhatna lantirna pakhat atan niin Cambodia lam chuan an sawi thung a.
PM Hun Sen chuan, “Ram pahnih inkara inthianna, inpumkhatna leh Cambodia leh ASEAN humanitarian assistance kaltlanga Myanmar ram tanpui nan Dollar nuai 1 kan thawh bakah, tunah hian Cambodia sorkar atangin pawisa fai dollar nuai 2 kan pe leh bawk dawn a ni,” tiin a sawi a.Mahse, heng pawisate hi Military council kuta lut vek tur a ni dawn a.
Heng bakah hian Myanmar ram tan hmai tuamna (mask) maktaduai 3, Covid rapid Antigen test kit nuai 5, PPE uniform 2000, Oxygen Concentrator 100, Ventilator 20, Patient Monitoring machine 20 leh damdawi lam hmanruate pawh telin, special flight hmanga pek thuai an tum thu PM Hun Sen chuan a sawi bawk a ni.
