Myanmar Military council-ten an la hren mek Daw Aung San Suu Kyi leh mi dang an man zawng zawng te chhuah zalen thuai turin Daw Aung San Suu Kyi fapa naupang zawh Mr Kim Aris (Ko Theing Linn) chuan Military council-te hnenah a ngen thu hriat a ni a.
Tum hmasa sorkar lai, ka nu Daw Aung San Suu Kyi house arrest-a an khung lai kha chuan kan chhungin kan tlawh thei a. Tun sorkar Sr. Gen. Min Aung Hlaing’n thuneihna a lak hnuah hi chuan khawi hmunah nge an khung tih pawh kan hre tawh lo tiin Mr Kim Aris chuan a sawi a.
Ka nu hmuh chakin Military council hnenah vawi tam tak ka dil tawh thin a, eng thu mah min chhang ngai lo tiin May 6 Inrinni London khawpui Myanmar Ambassdor office kawt, kawngzawhnaah a sawi a.
Ralkhat atanga a hriat dan chuan a nu Daw Aung San Suu Kyi hi mi dangho nen khung tlang lovin a hrana an awmtir thu a hriat avangin a hrilselna chungchangah a ngaihtuah hle thu Kim-a chuan a sawi zui bawk a ni.
Kim-a hian a nu leh mi dang tang te nen chhuah zalen thuai turin leh mipui sorkar a nih theih nan Military council hnenah a ngen thu hriat a ni bawk.
