State counsellor Daw Aung San Suu Kyi, Militaty council ten an thubuai awrhtir zinga thenkhat appeal an dilna chu Union Supreme Court chuan April 19 khan a pawm thu hriat a ni a, court-ah a inlan dawn thu court-a hnaivaite hnen atanga hriat a ni.
Daw Aung San Suu Kyi thubuai appeal tura an dil zawng zawng Union Supreme Court ten a pawm vek lova. Tun tumah hian NLD sorkar laia Helicopter hawh leh lei chungchanga case 5 te, vote tihchingpen case, section 130 (A) leh Myanmar sorkar thuruk case , section 3 (1) (C) te court-ah an zawt dawn a ni.
Kum 78 mi Daw Aung San Suu Kyi hi Military council ten thubuai 19 awrhtirin kum 33 Jail tang tura hrem a ni a. Heng a thubuai zawng zawng te hi kum 2022 December thla khan thutlukna siam vek a ni a. Tunah huan Naypyitaw khawpui Tan In pakhatah an khung hrang mek a ni.
Daw Aung San Suu Kyi Ukil hian Chawlhkar khatah vawi khat Lung in lehkha pek theihna a nei nain hmuh phalna hun a nei thei lo niin an sawi bawk.
Dan lova an man Daw Aung San Suu Kyi leh President U Win Mynit te hi chhuah zalen thuai turin UN Secretary leh US bakah EU leh ram hrang hrang ten an phut hlawm a ni.
Kum 2022 August 17 khan Myanmar UN secretary aiawh palai Nolin Hezer leh Military council puipa ber Gen. Min Aung Hlaing nen an inkawm tumin Daw Aung San Suu Kyi chhuah zalen thuai turin Nolin Hezer-an a phut a.
General Min Aung Hlaing chuan Daw Aung San Suu Kyi thubuai awrh zawng zawng chin fel vek kan tum dawn a nia tiin a chhang a. Tun dinhmunah hian Daw Aung San Suu Kyi leh President U Win Mynit te an Ukil te pawh hmuh an phal lova, biak pawh thei lovin an la khung hrang mek a ni.
